1995లో ఇదే రోజున తాను కెమెరాను ఫేస్ చేశానని ప్రముఖ నటి, నిర్మాత రేణు దేశాయ్ వెల్లడించారు. అసలు తాను ఎంచుకున్న ప్రొఫెషన్ ఒకటని కానీ అయ్యింది ఒకటని ఇన్‌స్టా వేదికగా రేణు చెప్పుకొచ్చారు. తాను 16 ఏళ్ల వయసులో ఊహించని పరిణామాల మధ్య కెమెరాను ఎదుర్కొన్నానని ఆమె తెలిపారు. తానొక అంతరిక్ష శాస్త్రవేత్తను కావాలని భావించానని కానీ ఆ కోరికను వదులుకోవడానికి తాను చాలా బాధపడ్డానని వెల్లడించారు. ఇది తనను కొన్నేళ్లపాటు బాధించిందని ఇన్‌స్టాలో రేణు దేశాయ్ వెల్లడించారు.

‘‘9 సెప్టెంబర్, 1995. నేను మొదటిసారి కెమెరాను ఫేస్ చేసి నేటికి 25 సంవత్సరాలు. నేను చిన్నప్పటి నుండి అంతరిక్ష శాస్త్రవేత్తనో లేదంటే న్యూరో సర్జన్‌నో కావాలనుకున్నా. నా మార్క్ షీట్లు నా కోరికలకు సపోర్ట్ ఇచ్చాయి. కానీ నా డెస్టినీ వేరే విధంగా ఉందని.. 16 ఏళ్ల వయసులో నేను కెమెరాను ఫేస్ చేసేంత వరకూ తెలియలేదు. ఫిల్మ్ మేకింగ్‌తో ప్రేమలో పడ్డాను. మిగిలిన చరిత్రంతా మీకు తెలిసిందే. అంతరిక్ష శాస్త్రవేత్త కావాలని.. నాసాలో చేరాలనే నా కలను వీడటం 16 ఏళ్ళ వయస్సులో నాది చాలా బాధాకరమైన నిర్ణయం.

కొన్నేళ్ల పాటు ఈ విషయంలో బాధ పడ్డాను. కానీ సినిమా తీయడం పట్ల నాకున్న ప్రేమ.. భౌతిక శాస్త్రం, గణితంపై నాకున్న ప్రేమను మరిపించింది. దర్శకురాలిగా నేను ఇప్పటికీ ‘స్టార్స్’తో వ్యవహరించాల్సి ఉంటుంది. మీ హార్ట్ ఎలా చెబితే అలా నడుచుకోండి. సిన్సియర్‌గా.. కష్టపడి పని చేస్తే సక్సెస్‌తో పాటు ఆనందం మీ సొంతమవుతుంది’’ అని రేణు తెలిపారు. అయితే రేణు ఇన్‌స్టాలో పోస్ట్ చేసిన పిక్స్ తన మొట్టమొదటి ఫోటో షూట్ సందర్భంగా జగన్ తీశారని.. ఆ సమయంలో ఫోటో షాప్ కానీ ఫ్యాన్సీ పరికరాలు కానీ లేవని రేణు తెలిపారు.