இயக்குனர் பாரதிராஜா வீட்டில் ஒரு கிலோ வெள்ளி திருட்டு!
- IndiaGlitz, [Wednesday,October 30 2019]
இயக்குனர் இமயம் பாரதிராஜா வீட்டில் ஒரு கிலோ வெள்ளி உள்பட லட்சக்கணக்கான மதிப்புள்ள பொருட்கள் மற்றும் ரொக்கம் திருடப்பட்டுள்ளது. இதுகுறித்து போலீசார் விசாரணை செய்து வருகின்றனர்.
தமிழ் சினிமாவில் புரட்சியை ஏற்படுத்திய இயக்குனர் இமயம் பாரதிராஜாவின் வீடு சென்னை தி.நகர் கிருஷ்ணா தெருவில் உள்ளது. இவர் இரண்டு நாட்களுக்கு முன் வழக்கம்போல் இரவில் தனது வீட்டின் இரண்டாவது தளத்தில் உள்ள தனது படுக்கை அறையில் தூங்கியுள்ளார். காலையில் கண் விழித்து பார்த்தபோது, வீட்டில் இருந்த தனது ரூ.1 லட்சம் மதிப்புள்ள ஐபோன், பூஜை அறையில் இருந்த 1 கிலோ வெள்ளிப் பொருட்கள், ரூ.15 ஆயிரம் ரொக்கம் ஆகியவை திருடப்பட்டிருப்பதைக் கண்டு அதிர்ச்சி அடைந்துள்ளார்.
இதுகுறித்து பாரதிராஜா கொடுத்த புகாரின் அடிப்படையில் மாம்பலம் போலீஸார் வழக்குப்பதிவு செய்து விசாரணை நடத்தி வருகின்றனர். பாரதிராஜாவின் வீடு மற்றும் அக்கம்பக்கத்தில் உள்ள வீடுகளின் சிசிடிவி கேமராக்களில் பதிவான காட்சிகளை போலீசார் ஆய்வு செய்து வருகின்றனர். மேலும் பாரதிராஜா வீட்டில் வேலை செய்யும் நபர்கள் மீதும் போலீசார் விசாரணை செய்து வருவதாகவும் விரைவில் திருடன் பிடிபடுவான் என்றும் போலீசார் தெரிவித்தனர்.