திரையரங்க வேலைநிறுத்தம் திடீர் வாபஸ்: நாளை முதல் இயங்கும் என அறிவிப்பு
- IndiaGlitz, [Thursday,March 22 2018]
சென்னை தவிர தமிழகம் முழுவதிலும் உள்ள திரையரங்குகள் கடந்த 16-ஆம் தேதி முதல் வேலைநிறுத்தம் செய்து வந்ததால் திரையங்குகள் இயங்கவில்லை. இந்த நிலையில் இன்று மாலை திரையரங்கு உரிமையாளர்கள் மற்றும் தமிழக அரசு அதிகாரிகள் பேச்சுவார்த்தை நடத்தினர். இந்த பேச்சுவார்த்தையில், திரையரங்கு உரிமையாளர்களின் நியாயமான கோரிக்கைகளை நிறைவேற்றுவதாக அரசு அதிகாரிகள் வாக்குறுதி அளித்துள்ளனர். இதனையடுத்து வேலைநிறுத்தம் வாபஸ் பெறப்படுவதாக திரையரங்க உரிமையாளர்கள் அறிவித்துள்ளனர்.
அரசு அதிகாரிகளின் உத்தரவாதத்தை அடுத்து நாளை முதல் தமிழகம் முழுவதும் திரையரங்குகள் இயங்கும் என்று திரையரங்கு உரிமையாளர்கள் சங்கத் தலைவர் அபிராமி ராமநாதன் தெரிவித்துள்ளார்.
இருப்பினும் புதிய திரைப்படங்கள் வெளியீடு இல்லை என்ற தயாரிப்பாளர் சங்கத்தின் முடிவில் மாற்றம் இல்லாததால் ஏற்கனவே ரிலீசான படங்கள் மட்டுமே மீண்டும் திரையிடப்படும் என்பது குறிப்பிடத்தக்கது.