'விக்ரம்' ரிலீஸ் ஆன அதே தேதி: மீண்டும் ரூ.500 கோடி மேஜிக் நடக்குமா?
- IndiaGlitz, [Wednesday,August 17 2022]
உலகநாயகன் கமல்ஹாசன் நடிப்பில், லோகேஷ் கனகராஜ் இயக்கத்தில், அனிருத் இசையில் உருவான ’விக்ரம்’ திரைப்படம் கடந்த ஜூன் மூன்றாம் தேதி உலகம் முழுவதும் வெளியாகி சுமார் 500 கோடி வசூல் செய்துள்ளதாக கூறப்படுகிறது. இந்த படத்தின் மாபெரும் வெற்றி தமிழ் சினிமாவுக்கே ஒரு புத்துணர்ச்சியை ஏற்படுத்தி உள்ளது என்பது குறிப்பிடத்தக்கது.
இந்த நிலையில் கமல்ஹாசன் நடிக்கவிருக்கும் அடுத்த திரைப்படமான ’இந்தியன் 2’ படத்தின் படப்பிடிப்பு வரும் 22ஆம் தேதி தொடங்க இருப்பதாக தகவல்கள் வெளியாகியுள்ளன. இந்தப்படத்தில் நெடுமுடி வேணு கேரக்டரில் நவரச நாயகன் கார்த்திக் நடிப்பார் என்றும் மேலும் ஒரு முக்கிய கேரக்டரில் சத்யராஜ் நடிப்பார் என்றும் கூறப்பட்டு வருகிறது. மேலும் காஜல் அகர்வால் இந்த படத்தின் படப்பிடிப்பில் செப்டம்பர் முதல் கலந்து கொள்வார் என தெரிகிறது.
’இந்தியன் 2’ படத்தின் படப்பிடிப்பு இன்னும் 60% முடிக்க வேண்டிய நிலை இருப்பதாகவும் இதனை அடுத்து இந்த படத்தின் படப்பிடிப்பை இந்த ஆண்டுக்குள் முடித்துவிட்டு அடுத்த ஆண்டு ஜூன் மாதம் ரிலீஸ் செய்ய திட்டமிடப்பட்டு இருப்பதாகவும் கூறப்படுகிறது.
இந்த ஆண்டு ஜூன் மாதம் மூன்றாம் தேதி அன்று ’விக்ரம்’ ரிலீஸ் ஆன அதே தேதியில் அடுத்த ஆண்டு ’இந்தியன் 2’ படத்தையும் ரிலீஸ் செய்ய படக்குழு திட்டமிட்டிருப்பதாக கூறப்படுகிறது. லைகா நிறுவனத்தின் தயாரிப்பில் உருவாகி வரும் இந்த படம், ’விக்ரம்’ செய்த ரூ.500 கோடி வசூல் என்ற மேஜிக்கை மீண்டும் செய்யுமா? என்பதை பொறுத்திருந்து பார்ப்போம்.