బిత్తిరి సత్తి.. ఈ పేరు తెలియని వారు దాదాపు తెలుగు రాష్ట్రాల్లో ఎవరూ ఉండరు. కాస్త టీవీ చూసే అలవాటు ఉంటే ఇక కొత్త పరిచయం చేయనక్కర్లేదు. ఇతని ఒరిజనల్ పేరు రవికుమార్. జీరో నుంచి మొదలై హీరో స్థాయికి ఎదిగిన ఈ బిత్తిరోడి జీవితంలో ఎన్నో ఒడిదుడుకులు.. మరెన్నో అవమానాలు.. ఉన్నాయి. తాను హీరోగా నటించిన ‘తుపాకి రాముడు’ మూవీ ప్రమోషన్‌లో భాగంగా ఓ ప్రముఖ యూ ట్యూబ్‌తో చానెల్‌తో మాట్లాడిన ఆయన.. తన జీవితంలో జరిగిన పలు ఆసక్తికర విషయాలను వెల్లడించాడు.

ఎన్నో అవమానాలు భరించాను..!

‘నాకు నటన అంటే మొదట్నుంచి ఇష్టం. స్క్రీన్‌పై కనిపించాలని చాలా ప్రయత్నాలు చేశాను. నేను సెట్ బాయ్‌గా కూడా పనిచేశాను. ఆ తర్వాత డబ్బింగ్ ఆర్టిస్ట్ గానైనా నిలదొక్కుకోవాలి.. ఆర్టిస్టులకు సంబంధించిన.. వాళ్లు చెప్పిన అని పనులు చేసేవాడ్ని. ఈ క్రమంలో ఎన్నో ఇబ్బందులు పడ్డాను.. కొన్ని కొన్నిసార్లు ప్రమాదాలకు కూడా గురయ్యాను. అవమానాలు ఎదురైనా, ఎదురు మాట్లాడితే అవకాశాలు ఇవ్వరనే భయంతో మౌనంగా ఉండిపోయేవాడిని’ అని బిత్తిరిసత్తి భావోద్వేగానికి లోనయ్యాడు.

నేను పడ్డ కష్టాలు అన్నీ ఇన్నీ కావు!

‘నటనపై ప్రేమతో చిన్న చిన్న పాత్రల్లో నటించాలని చాలా కష్టపడ్డాను. అయితే సరిగ్గా అవకాశం వచ్చినప్పుడు ఏదో ఒకటి జరిగేది. సరిగ్గా నాకు వచ్చిన అవకాశాన్ని ఎవరో ఒకరు ఎగరేసుకునిపోయేవారు. అయితే ఎందుకిలా చేస్తున్నారు..? అనేది ఎన్నిసార్లు ఆలోచించినా అప్పట్లో అస్సలు అర్థమయ్యేది కాదు. ఇలాంటి సంఘటనలు జరిగినప్పుడు నాకు ఎంతో బాధ కలిగేది. ఇలా ఈ స్థాయికి చేరుకోవడానికి నేను పడిన కష్టాలు అన్నీ ఇన్నీకావు’ అని రవికుమార్ తెలిపాడు.

ఆ చానెల్‌‌ను ఎందుకు వదిలినట్లు!?

తీన్‌మార్ వార్తలతో తెలుగు ప్రజలకు పరిచయం అయిన సత్తి.. ఆ తర్వాత ఎవరికీ అందనంత.. తాను కలలో కూడా ఊహించనంత ఎత్తుకు ఎదిగిపోయాడు. ఒకానొక సందర్భంలో ఈయన పనిచేసిన చానెల్‌లో.. బిత్తిరి అంటే చానెల్.. చానెల్ అంటే బిత్తిరోడు.. అనేంత పరిస్థితులు ఉండేవి. ఎందుకంటే బిత్తిరోడి రేంజ్ అలాంటిది మరి. అయితే ఉన్నట్టుండి ఏం జరిగిందో ఏమోగానీ.. సడన్‌గా ఆ చానెల్‌ నుంచి బయటికొచ్చి ఓ టాప్ చానెల్‌లో జాయిన్ అయ్యాడు. దీనివెనుక కారణమేంటి..? అని అడగ్గా వివరణ ఇచ్చాడు.

ఇదీ కారణం!

‘చానెల్‌లో నాకు ఇదివరకు ఉన్న గౌరవం కానీ మర్యాద కానీ ప్రాధాన్యత కానీ ఇవ్వట్లేదు. నన్ను చాలా లైట్‌గా తీసుకున్నారు. అందుకే ప్రాధాన్యత లేని చోట ఉండటం కష్టమని భావించి నాకు నేనుగా బయటికి వచ్చేశాను. అయితే నాకు లైఫ్ ఇచ్చిన ఛానెల్ నుంచి బయటికి రావడానికి చాలా ఆలోచించాను. అయితే వాటికి పక్కా కారణాలున్నాయి కాబట్టే వచ్చాను. ఆ ఛానెల్లో ఓ సారి నన్ను కొట్టారు. అవును నేను ఎక్కువగా డబ్బులు అడిగాను.. తప్పేముంది టీఆర్పీలు ఇవ్వాలి కానీ.. నాకు డబ్బులు వద్దా..?. నా టాలెంట్ నాకు ఉంది కదా..?’ అని రవి వివరణ ఇచ్చుకున్నాడు.

ఇప్పుడు.. ఆల్ హ్యాపీస్!

అయితే ప్రస్తుతం తెలుగులోని ఓ ప్రముఖ చానెల్‌లో యాంకర్‌గా పనిచేస్తూ భారీగానే రెమ్యునరేషన్ పుచ్చుకుంటున్నాడు. ఓ వైపు టీవీ.. మరో సినీ రంగంలో బాగానే రాణిస్తూ రెండు చేతులతో సంపాదిస్తున్నాడు.. ఇప్పుడంతా వెల్ సెటిల్డ్.. ఆల్ హ్యాపీస్!. అంతేకాదు.. దీపం ఉండగానే ఇళ్లు సద్దుకోవాలన్నట్లుగా బాగా డబ్బులు సంపాదిస్తున్న సమయంలోనే గట్టిగా వెనకేసుకుని బిజినెస్ రంగంలోకి కూడా దిగాడు బిత్తిరి. అంతేకాదు.. ఈవెంట్స్‌, ఓపెనింగ్, ప్రకటనలు ఇలా కార్యక్రమాలకు వెళ్లినప్పుడు బాగానే పుచ్చుకుంటాడట.

హీరోగా వచ్చేస్తున్నడహో..!

ఇంతవరకూ సినిమాల్లో చిన్నపాటి పాత్రలో నటించే బిత్తిరి.. ఈసారి ఏకంగా సినిమానే చేశాడు. ‘తుపాకి రాముడు’ అనే సినిమా‌తో అక్టోబర్ 25న థియేటర్లలోకి వస్తున్నాడు. కాగా.. ఈ చిత్రాన్ని తెలంగాణ ఎమ్మెల్యే రసమయి బాలకిషన్ నిర్మించగా.. ప్రీ రిలీజ్‌ ఈవెంట్‌కు మంత్రి హరీశ్ రావు, మంత్రి ఈటల రాజేందర్‌తో పాటు పలువురు ఎమ్మెల్యేలు హాజరవ్వగా ఈ ఈవెంట్ గ్రాండ్ సక్సెస్ అయ్యింది. అయితే బుల్లితెరపై గ్రాండ్ సక్సెస్ అయిన బిత్తిరి.. వెండితెరపై ఏ మాత్రం రాణిస్తాడో..? ఏ మేరకు అభిమానుల మన్ననలు పొందుతాడో తెలియాలంటే మరికొన్ని గంటలు వేచి చూడాల్సిందే మరి.