கொரோனா வைரஸ் பாதிப்பிலிருந்து விடுபட தற்போது இந்தியா உள்பட உலகம் முழுவதும் கொரோனா வைரஸ் தடுப்பூசி போடப்பட்டு வருகிறது. அந்த வகையில் கொரோனா தடுப்பூசி போட்டுக் கொண்ட முதல் நடிகை என்ற பெருமையை ரஜினி படத்தில் நடித்த நடிகை ஒருவர் தட்டிக் கொண்டு சென்றுள்ளார்

ரஜினிகாந்த், அமிதாப் பச்சன் உள்பட பலர் நடித்த ’ஹம்’ என்ற திரைப்படத்தில் நடித்தவர் நடிகை ஷில்பா ஷிரோட்கர். இவர் கடந்த 90களில் பாலிவுட்டில் பிரபல நடிகையாக இருந்தவர் என்பதும் தற்போது இவர் கணவர் மற்றும் குழந்தைகளுடன் துபாயில் உள்ளார் என்பதும் குறிப்பிடத்தக்கது

இந்த நிலையில் துபாயில் கடந்த சில நாட்களாக பொதுமக்களுக்கு கொரோனா தடுப்பூசி போடப்பட்டு கொண்டிருக்கும் நிலையில் தானும் கொரோனா தடுப்பூசியைப் போட்டுக் கொண்டதாகவும், அதற்காக துபாய் அரசுக்கு நன்றி என்றும் அவர் தனது இன்ஸ்டாகிராம் பக்கத்தில் தெரிவித்துள்ளார்

இதுவரை வெளிவந்த செய்திகளின்படி எந்த இந்திய நடிகையும் கொரோனா வைரஸ் தடுப்பூசி போட்டுக் கொண்டதாக தெரியவில்லை. எனவே கொரோனா தடுப்பூசி போட்டுக் கொண்ட முதல் நடிகை என்ற பெருமையை இவர் பெறுகிறார் என்பதும், இதனைஅடுத்து அவருக்கு ரசிகர்கள் வாழ்த்துக்களை குவித்து வருகின்றனர் என்பதும் குறிப்பிடத்தக்கது