தளபதி விஜய் நடித்த 'மெர்சல்' திரைப்படம் கடந்த தீபாவளி அன்று வெளியாகி ரூ.250 கோடிக்கும் மேல் வசூலாகி உலகம் முழுவதும் சூப்பர் ஹிட் ஆகியுள்ளது. இந்த நிலையில் விஜய்யின் 62வது படம் குறித்த தகவல்கள் அவ்வப்போது வெளிவந்து கொண்டிருக்கின்றது.

'தளபதி 62' படத்தை ஏ.ஆர்.முருகதாஸ் இயக்குவது ஏற்கனவே உறுதி செய்யப்பட்ட நிலையில் இந்த படத்தின் ஒளிப்பதிவாளர் மற்றும் எடிட்டர் குறித்த தகவல் தற்போது வெளிவந்துள்ளது. இந்த படத்திற்கு ஸ்ரீகர் பிரசாத் படத்தொகுப்பு    செய்யவுள்ளதாக தெரிகிறது. இவர் ஏற்கனவே விஜய்-முருகதாஸ் முதன்முதலில் இணைந்த 'துப்பாக்கி' படத்தை படத்தொகுப்பு   செய்தவர் என்பது குறிப்பிடத்தக்கது.

அதேபோல் இந்த படத்திற்கு கிரிஷ் கங்காதரன் ஒளிப்பதிவு செய்யவுள்ளதாக கூறப்படுகிறது. இவர் கடந்த சில மாதங்களுக்கு முன்னர் வெளிவந்த மலையாள திரைப்படமான 'அங்கமாலே டயரீஸ்' (Angamaly Diaries) என்ற படத்திற்கு ஒளிப்பதிவு செய்தவர் என்பது குறிப்பிடத்தக்கது. ஒளிப்பதிவாளர், எடிட்டர் குறித்த விபரங்கள் இன்னும் ஒருசில நாட்களில் அதிகாரபூர்வமாக அறிவிக்கப்படவுள்ளதாக கூறப்படுகிறது.

மேலும் இந்த படத்தில் நடிக்கும் நாயகி உள்பட மற்ற நட்சத்திர தேர்வுகள் நடைபெற்று வருவதாகவும், வெகுவிரைவில் இந்த படத்தின் அதிகாரபூர்வ அறிவிப்பில் அனைத்து விபரங்களும் தெரியவரும் என்றும் கூறப்படுகிறது.