மதுரை என்கவுண்டரின் பின்னணி என்ன? திடுக்கிடும் தகவல்
- IndiaGlitz, [Friday,March 02 2018]
இன்று மாலை மதுரையில் இரண்டு ரவுடிகள் போலீசாரால் சுட்டு கொல்லப்பட்டு என்கவுண்டர் செய்த சம்பவம் தமிழகத்தை பெரும் பரபரப்பை ஏற்படுத்திய நிலையில் இதுகுறித்த புதிய தகவல்கள் தற்போது வெளிவந்துள்ளது.
மதுரையை சேர்ந்த 29 வயது இருளாண்டி என்பவர் மீது கொலை, கொள்ளை உள்பட பல்வேறு குற்றச்சாட்டுக்கள் இருந்ததால் அவரை போலீஸார் கடந்த சில நாட்களாக தேடி வந்தனர். இந்த நிலையில் இருளாண்டி, சகுனி கார்த்திக் என்ற மற்றொரு ரவுடியின் வீட்டில் இருப்பதாகவும், இருவரும் சேர்ந்து மதுரையை சேர்ந்த ஒரு முக்கிய பிரமுகரை கொலை செய்ய திட்டமிட்டுள்ளதாகவும், மதுரை போலீசாருக்கு திடுக்கிடும் ரகசிய தகவல் வந்தது.
இதனையடுத்து சகுனி கார்த்திக்கின் வீட்டை போலீசார் முற்றுகையிட்டனர். இதனால் அதிர்ச்சி அடைந்த இரண்டு ரவுடிகளும் போலீசாரை நோக்கி சுட்டதால் பாதுகாப்பு கருதி போலீசாரும் திருப்பி சுட்டனர். இந்த துப்பாக்கி சூடு தாக்குதலில் இருளாண்டி, சகுனிகார்த்திக் இருவரும் கொல்லப்பட்டனர். இருப்பினும் இவர்கள் இருவரும் கொலை செய்ய திட்டமிட்ட முக்கிய பிரமுகர் குறித்த தகவல் தெரியவில்லை. இவர்களுடைய கூட்டாளிகளை பிடித்தால் மட்டுமே இந்த தகவல் கிடைக்கும் என்பதால் போலீசார் மதுரை முழுவதும் சல்லடை போட்டு தேடி வருவதாக போலீஸ் வட்டாரங்கள் தெரிவிக்கின்றன