మెగాస్టార్ చిరంజీవి నట వారసుడిగా ఎంట్రీ ఇచ్చి.. ఫైట్లు, డ్యాన్స్, నటనలో తండ్రికి తగ్గ కొడుకుగా గుర్తింపు తెచ్చుకున్నారు మెగాపవర్ స్టార్ రామ్‌చరణ్ తేజ్. అంతేకాదు ... సామాజిక సేవలోనూ చిరంజీవికి ఏమాత్రం తీసిపోనని నిరూపించుకుంటున్నారు. తండ్రి అడుగుజాడల్లో తన కెరీర్‌ను జాగ్రత్తగా నిర్మించుకుంటూ వస్తున్న ఆయన.. మెగా పవర్ ‌స్టార్‌గా ఇప్పుడు గ్లోబల్ స్టార్‌గా ఎదిగిపోయారు. ఇంతకంటే ఒక తండ్రికి పుత్రోత్సాహం ఏముంటుంది. కొడుకును చూసి తాను ఎంతో గర్వంగా ఫీల్ అవుతానని పలుమార్లు వేదికలపై చెప్పారు చిరు.

కెరీర్‌లో ఎన్నో ఘనతలు అందుకున్న రాంచరణ్ తాజాగా మరో అరుదైన గుర్తింపును పొందారు. ప్రతిష్టాత్మక ఆస్కార్ అకాడమీ బ్రాంచ్‌లో స్థానం సంపాదించుకున్నారు. అకాడమీ నుంచి లేటెస్ట్‌గా విడుదలైన యాక్టర్స్ బ్రాంచ్ కొత్త లిస్టులో చరణ్ పేరు ప్రకటించారు. ఆయనతో పాటు మరో ఏడుగురు నటులు కూడా యాక్టర్స్ బ్రాంచ్‌లో చేరారు. దీంతో రామ్ చరణ్ అభిమానులు ఫుల్ సంబరాలు చేసుకుంటున్నారు. తమ అభిమాన నటుడికి శుభాకాంక్షలు తెలియజేస్తూ పోస్టులు పెడుతున్నారు.

ఇకపోతే.. ఇప్పటికే ఆస్కార్ యాక్టర్స్ బ్రాంచ్‌లో జూనియర్ ఎన్టీఆర్‌ సభ్యత్వం సాధించిన సంగతి తెలిసిందే. అకాడమీ ఆఫ్ మోషన్ పిక్చర్స్ అండ్ ఆర్ట్స్ కొత్త సభ్యులను ఎంపిక చేస్తుంది.. అందులో ఈసారి ఎన్టీఆర్ పేరును కూడా ప్రకటించింది. జూనియర్‌తో పాటు నలుగురు హాలీవుడ్ నటులకు కూడా ఇందులో స్థానం కల్పించింది. వారే కే హుయ్ క్వాన్, మార్షా స్టెఫానీ బ్లేక్, కెర్రీ కాండన్, రోసా సలాజర్ . అకాడమీ యాక్టర్స్ బ్రాంచ్‌లో స్థానం సంపాదించాలంటే అభ్యర్ధి (నటుడు లేదా నటి) కనీసం మూడు థియేట్రికల్ ఫీచర్ ఫిల్మ్‌లలో నటించి వుండాలి. వాటిలో ఒకటి గడిచిన ఐదేళ్లలో విడుదలై వుండాలి. అలాగే ఏదో ఒక విభాగంలో ఆస్కార్‌కు నామినేట్ అయ్యుండాలి.

సినిమాల విషయానికి వస్తే .. రామ్ చరణ్ ప్రస్తుతం తమిళ దర్శక దిగ్గజం శంకర్‌తో ‘‘గేమ్ ఛేంజర్’’ సినిమాలో నటిస్తున్న సంగతి తెలిసిందే. దిల్‌రాజు నిర్మిస్తున్న ఈ చిత్రం శరవేగంగా చిత్రీకరణ జరుపుకుంటోంది. ఈ సినిమాలో బాలీవుడ్ నటుడు హ్యారీ జోష్ విలన్‌గా నటిస్తున్నారు. ఎస్‌జే సూర్య, నవీన్ చంద్ర, శ్రీకాంత్, సముద్రఖని, జయరామ్, సునీల్, అంజలి ఇతర కీలక పాత్రలు పోషిస్తున్నారు. రామ్ చరణ్ సరసన కియారా అద్వానీ హీరోయిన్‌గా నటిస్తున్నారు. తెలుగు, తమిళ, హిందీ భాషల్లో ‘‘గేమ్ ఛేంజర్’’ను గ్రాండ్‌గా విడుదల చేయనున్నారు.