పలువురు బుల్లితెర నటులు కరోనా బారిన పడటంతో ఇతర నటీనటులకు, యాక్టర్స్‌కూ కరోనా ఉందంటూ రూమర్స్ పెరిగిపోతున్నాయి. తాజాగా యాంకర్ ఝాన్సీకి కూడా కరోనా సోకందంటూ సోషల్ మీడియాలో తెగ ప్రచారం జరిగింది. దీంతో ఝాన్సీ తన ఆరోగ్యంపై వివరణనిస్తూ ఇన్‌స్టాగ్రాంలో ఓ వీడియో పోస్ట్ చేసింది.

‘‘చాలా మంది నా ఆరోగ్యం ఎలా ఉందని కాల్ చేసి అడుగుతున్నారు. ఐసోలేషన్‌కు, క్వారంటైన్‌కు తేడా ఉంది. ఇటీవల నేను చేసిన పోస్ట్‌ను అందరూ తప్పుగా అర్థం చేసుకున్నారు. నా పోస్టును చూడని వాళ్లు కన్ఫ్యూజ్ అవుతున్నారు. నేను వర్క్‌ చేసే సెట్‌లో ఇద్దరికి కరోనా పాజిటివ్‌గా నిర్ధారణ అయింది. ఇది చాలా సాధారణ విషయం. అందుకే ముందు జాగ్రత్తగా నేను ఐసోలేషన్‌లో ఉన్నా. మనం అంతా తిరిగేసి ఎందరికో వ్యాప్తి చేసేకంటే రెండు వారాలు ఇంట్లో ఉండటం బెటర్.

ఇప్పటికే ఏడు రోజుల ఇంక్యుబేషన్‌ సమయం పూర్తయింది. మరో వారం రోజులు ఇంట్లోనే ఉంటా. రిస్క్‌ తీసుకోకూడదనే ఉద్దేశంతోనే నేను ఈ నిర్ణయం తీసుకున్నా. ఈ వారం తరువాత నాలో ఏమైనా సింమ్టమ్స్ బయట పడితే నేను వెళ్లి టెస్ట్ చేయించుకుంటా. నేను ఒకవేళ పాజిటివ్ అయితే నా ఆరోగ్యం గురించి ఎప్పటికప్పుడు మీకు సమాచారం ఇస్తా. ఇప్పటికైతే నాకు ఎలాంటి కరోనా లక్షణాలు లేవు. దయచేసి తప్పుడు వార్తలను ప్రచారం చేయకండి’’ అని ఝాన్సీ స్పష్టం చేసింది.