వైసీపీ ఎఫెక్ట్.. ఆ పార్టీ గుర్తు పక్కనెట్టిన ఎన్నికల కమిషన్!
- IndiaGlitz, [Sunday,March 10 2019]
ఏపీలో త్వరలో జరగనున్న ఎన్నికల్లో టీడీపీ, వైసీపీ, జనసేన, కాంగ్రెస్, బీజేపీలతో పాటు ప్రజాశాంతి పార్టీ కూడా తలపడుతున్న సంగతి తెలిసిందే. కాగా పైవాటిలో జనసేన, ప్రజాశాంతి పార్టీలకు తాజాగా ఎన్నికల గుర్తులను ఈసీ కేటాయించడం జరిగింది. జనసేనకు ‘గ్లాసు’ గుర్తు రాగా.. ప్రజాశాంతి పార్టీ ‘హెలికాఫ్టర్’ గుర్తు వచ్చింది. అయితే హెలికాఫ్టర్.. వైసీపీ గుర్తు అయిన ఫ్యాన్ రెండూ దాదాపు ఒకేలా ఉంటాయని భావించిన ఆ పార్టీ అధిష్టానం ఎన్నికల సంఘానికి ఫిర్యాదు చేసింది.
ఇప్పటికే తెలంగాణ ఎన్నికల్లో కారు, ట్రక్కు గుర్తుతో ఇబ్బందులు తలెత్తిన సంగతి తెలిసిందే. ఈ నేపథ్యంలో వైసీపీ ఫిర్యాదుతో ప్రజా శాంతి పార్టీకి కేటాయించిన హెలికాప్టర్ గుర్తును కేంద్ర ఎన్నికల సంఘం పక్కన పెట్టే యోచనలో ఉన్నట్లు తెలుస్తోంది. కాగా.. ఆ గుర్తును తొలగించి ప్రజాశాంతి పార్టీకి మరో గుర్తు ఇవ్వాలని వైసీపీ సీనియర్ నేత వైవీ సుబ్బారెడ్డి కేంద్ర ఎన్నికల సంఘాన్ని కోరిన సంగతి తెలిసిందే. ఈ విజ్ఞప్తి పై ప్రజాశాంతి పార్టీకి ఎన్నికల సంఘం నోటీసులు జారీ చేయడం జరిగింది.