விக்ரம் நடிப்பில், பா ரஞ்சித் இயக்கத்தில் உருவான ’தங்கலான்’ திரைப்படம் ரிலீஸ்க்கு தயாராகி சில மாதங்கள் ஆன நிலையில் சரியான ரிலீஸ் தேதிக்காக காத்திருந்தது என்பதை ஏற்கனவே பார்த்தோம். இந்த நிலையில் தற்போது தயாரிப்பாளர் தனஞ்ஜெயன் சமீபத்தில் அளித்த பேட்டியில் ’தங்கலான்’ திரைப்படம் ஆகஸ்ட் 15ஆம் தேதி வெளியாகும் என்று கூறியுள்ளதால் விக்ரம் ரசிகர்கள் மகிழ்ச்சியில் உள்ளனர்.

அல்லு அர்ஜுன் நடித்த ’புஷ்பா’ 2 திரைப்படம் ஆகஸ்ட் 15ஆம் தேதி வெளியாக இருந்த நிலையில் அந்த படம் டிசம்பர் மாதத்திற்கு தள்ளிப்போனதை அடுத்து ’தங்கலான்’ உள்பட சில படங்கள் ஆகஸ்டு 15ஆம் தேதி வெளியாகும் என்று எதிர்பார்க்கப்பட்ட நிலையில் தற்போது ’தங்கலான்’ ரிலீஸ் தேதி உறுதி செய்யப்பட்டுள்ளது. இதனை அடுத்து கார்த்தி நடித்த ’மெய்யழகன்’ உட்பட மேலும் சில படங்கள் இதே தேதியில் வெளியாக வாய்ப்பு இருப்பதாக கூறப்படுகிறது.

’தங்கலான்’ படத்தின் ரிலீஸ் தேதி மட்டுமின்றி அடுத்தடுத்து இந்த படத்தின் அப்டேட்டுகள் தொடர்ச்சியாக வரும் என்றும் குறிப்பாக டீசர், ட்ரெய்லர், இசை வெளியீட்டு விழா ஆகிய விழாக்களையும் நடத்த படக்குழுவினர் திட்டமிட்டுள்ளதாக தெரிகிறது.

சில மாதங்களாக ’தங்கலான்’ படம் குறித்த எந்த விதமான அப்டேட்டும் இல்லாமல் இருந்ததால் விக்ரம் ரசிகர்கள் அதிருப்தியில் இருந்த நிலையில் அடுத்தடுத்து இனி இந்த படத்தின் அப்டேட் வரவுள்ளது ரசிகர்களுக்கு மகிழ்ச்சியை ஏற்படுத்தி உள்ளது. மேலும் இந்த படத்தின் சென்சார் பணிகள் ஜூலை மாதம் நடைபெறும் என்றும் அதேபோல் அதிகாரப்பூர்வமான ரிலீஸ் தேதி இன்னும் சில நாட்களில் வெளியாகும் என்றும் தெரிவிக்கப்பட்டுள்ளது.

விக்ரம், மாளவிகா மோகனன், பார்வதி, பசுபதி உள்பட பலரது நடிப்பில் உருவாகிய ‘தங்கலான்’ திரைப்படம் ஜிவி பிரகாஷ் இசையில், கிஷோர் குமார் ஒளிப்பதிவில், செல்வா படத்தொகுப்பில் உருவாகியுள்ளது.