கோலிவுட் திரையுலகில் சமீபத்தில் நடிகர் சங்கம், தயாரிப்பாளர் சங்கம் உள்பட பல சங்கங்களுக்கு தேர்தல் நடத்தப்பட்டு புதிய நிர்வாகிகள் தேர்வு செய்திருப்பதை அடுத்து இன்று இயக்குனர்கள் சங்கத்திற்கு தேர்தல் நடைபெறவுள்ளது.

சென்னை வடபழனியில் உள்ள சினிமா இசைக்கலைஞர்கள் சங்கத்தில் நடைபெறவுள்ள இந்த தேர்தலுக்கு முன்னாள் மாவட்ட நீதிபதி கே.பாலசுப்பிரமணியம் அவர்கள் தேர்தல் அதிகாரியாக பணியாற்றுகிறார். 21 பதவிகளுக்கு நடைபெறும் இந்த தேர்தலில் 2037 பேர் வாக்களிக்கவுள்ளனர். பதிவாகும் வாக்குகள் எண்ணப்பட்டு இன்று இரவுக்குள் புதிய நிர்வாகிகள் யார் என்பது குறித்த விபரங்கள் அறிவிக்கப்படவுள்ளது.

இந்த தேர்தலில் போட்டியிடும் அணிகள் குறித்த விபரங்கள்:

1. புதுவசந்தம் அணி:

தலைவர் வேட்பாளர்: விக்ரமன்

துணைத்தலைவர் வேட்பாளர்: கே.எஸ்.ரவிகுமார், ஆர்.வி.உதயகுமார்

செயலாளர் வேட்பாளர்: ஆர்.கே.செல்வமணி

பொருளாளர் வேட்பாளர்: பேரரசு

இணைச் செயலாளர்கள் வேட்பாளர்கள்: ரமேஷ் கண்ணா, மனோஜ்குமார், ஏ.வெங்கடேஷ், அறிவழகன் என்ற சோழன்.

2. புதிய அலைகள் அணி:

தலைவர், செயலாளர் பதவிக்கு யாரும் போட்டியிடவில்லை

பொருளாளர் வேட்பாளர்: ஆ.ஜெகதீசன்

துணைத் தலைவர் வேட்பாளர்: வி.சுப்பிரமணியம் சிவா,

இணைச் செயலாளர்கள் வேட்பாளர்கள்: ஜி.ஐந்துகோவிலான், நாகராஜன், மணிகண்டன் பி.பாலமுரளிவர்மன் மற்றும் ஆ.ராமகிருஷ்ணன்.

மேலும் தலைவர் பதவிக்கு சுயேட்சையாக இயக்குனர் ஈ.ராமதாஸ் என்பவர் போட்டியிடுகிறார் என்பது குறிப்பிடத்தக்கது.