కరోనా కారణంగా తీవ్రంగా నష్టపోయిన పరిశ్రమలో సినీ పరివ్రమ ఒకటి. దీనిపై ఆధారపడి ఎంతో మంది జీవిస్తున్నారు. ఐదు నెలలుగా సినిమా షూటింగ్‌లు లేకపోవడంతో దీనిపై ఆధారపడిన ఎన్నో జీవితాలు రోడ్డున పడ్డాయి. ఇటీవల రెండు తెలుగు ప్రభుత్వాలు షూటింగ్‌లకు పర్మిషన్ ఇవ్వడంతో చిన్న చిన్న సినిమాలు షూటింగ్ జరుపుకుంటున్నాయి. పెద్ద సినిమాలు మాత్రం షూటింగ్‌కు నోచుకుకోవడం లేదు. అయితే తాజాగా పవర్ స్టార్ పవన్ కల్యాణ్ నటిస్తున్న ‘వకీల్ సాబ్’ చిత్ర యూనిట్ మాత్రం ఓ అడుగు ముందుకేసింది.

పవన్ అభిమానులకు ప్రముఖ సంగీత దర్శకుడు తమన్ గుడ్ న్యూస్ చెప్పారు. చాలా కాలం బ్రేక్ తీసుకున్న అనంతరం ‘వకీల్ సాబ్’ వర్క్‌ను తిరిగి ప్రారంభించినట్టు తమన్ ఇన్‌స్టాగ్రాం వేదికగా వెల్లడించారు. ‘వకీల్ సాబ్’ చిత్రానికి తమన్ సంగీతం అందిస్తున్నారు. ‘‘వకీల్ సాబ్’ పనులు చాలా కాలం బ్రేక్ తర్వాత తిరిగి ప్రారంభమయ్యాయి. పవర్ స్టార్ కోసమైతే.. అన్ని సినిమాల కంటే భిన్నంగా ఈ సినిమా కోసం తన టాలెంట్ మొత్తం వినియోగిస్తాను’’ అని తమన్ ఇన్‌స్టాగ్రాంలో వెల్లడించారు.

జనసేన అధినేత కాస్తా తిరిగి పవర్ స్టార్‌గా మారి చేస్తున్న తొలి సినిమా ‘వకీల్ సాబ్’. ఏపీలో అసెంబ్లీ ఎలక్షన్స్ దగ్గర నుంచి ఆయన సినిమాలకు కాస్త విరామం ఇచ్చారు. మళ్లీ తిరిగి సినిమాను ప్రారంభించడంతో అభిమానులు సంబరాల్లో మునిగి తేలుతున్నారు. హిందీలో అమితాబ్ బచ్చన్, తాప్సి ప్రధాన పాత్రల్లో రూపొందిన పింక్ అనే బాలీవుడ్ మూవీకి తెలుగు రీమేక్‌గా వకీల్ సాబ్ తెరకెక్కుతోంది. వేణు శ్రీరామ్ ఈ చిత్రానికి దర్శకత్వం వహిస్తున్నారు.