கொரோனா காரணமாக ஊரடங்கு உத்தரவு பிறப்பிக்கப்பட்டுள்ளதை அடுத்து ஏழை எளிய மக்களுக்கு திரையுலகினர் பலர் நிதியுதவி செய்து வரும் நிலையில் தளபதி விஜய் ரூ.1.30 கோடி நிதியுதவி செய்தார் என்பது குறித்த செய்தியை ஏற்கனவே பார்த்தோம். இதில் பிரதமர் நிவாரண நிதியாக ரூ.25 லட்சமும், தமிழக முதல்வர் நிவாரண நிதியாக ரூ.50 லட்சமும், கேரள முதல்வர் நிவாரண நிதியாக ரூ.10 லட்சமும், பெப்சி அமைப்புக்கு ரூ.25 லட்சமும், கர்நாடகா முதல்வர் நிவாரண நிதியாக ரூ.5 லட்சமும், ஆந்திரமுதல்வர் நிவாரண நிதியாக ரூ.5 லட்சமும், தெலுங்கானா முதல்வர் நிவாரண நிதியாக ரூ.5 லட்சமும், புதுவை முதல்வர் நிவாரண நிதியாக ரூ.5 லட்சம் என மொத்தம் ரூ.1.30 கோடி நிதியுதவி செய்துள்ளார் என்பது குறிப்பிடத்தக்கது.

இந்த நிலையில் இதுபோக விஜய் மக்கள் மன்ற நிர்வாகிகளுக்கும் விஜய் பணம் அனுப்பியுள்ளதாகவும் அவர்கள் மூலமாக நேரடியாக மக்களுக்கு உதவிகள் சென்று கொண்டிருப்பதாகவும் செய்திகள் வெளிவந்தது. இந்த நிலையில் தற்போது விஜய், தனது விஜய் மக்கள் மன்ற நிர்வாகிகள் ஒவ்வொருவருக்கும் ரூ.5000 அனுப்பியுள்ளதாக தெரிகிறது. இதுகுறித்த ஆவணங்கள் தற்போது சமூக வலைத்தளங்களில் வைரலாகி வருகிறது.

இதேபோல் சுமார் 1000 நிர்வாகிகளுக்கு தலா ரூ.5000 அனுப்பியுள்ளதாகவும், இந்த பணத்தின் மூலம் தேவையான மக்களுக்கு அத்தியாவசிய பொருட்கள் சென்று கொண்டிருப்பதாகவும் செய்திகள் வெளிவந்துள்ளது. ஏற்கனவே புயல், வெள்ளத்தின்போதும் விஜய் மக்கள் மன்ற நிர்வாகிகளுக்கு பணம் அனுப்பி பாதிக்கப்பட்டவர்களுக்கு விஜய் உதவியுள்ளார் என்பது குறிப்பிடத்தக்கது.