இயக்குனர் சித்திக் மறைவு.. தளபதி விஜய்யின் நெகிழ்ச்சியான செயல்..!
- IndiaGlitz, [Thursday,August 17 2023]
பிரபல மலையாள திரைப்பட இயக்குனர் சித்திக் கடந்த வாரம் காலமான நிலையில் தளபதி விஜய் அவருடைய குடும்பத்தினருடன் போனில் தொடர்பு கொண்டு தனது ஆழ்ந்த இரங்கலை தெரிவித்ததாக தகவல் வெளியாகியுள்ளது.
விஜய், சூர்யா நடித்த ’பிரண்ட்ஸ்’ விஜய் நடித்த ’காவலன்’ உள்ளிட்ட சில தமிழ் படங்களையும், ஏராளமான மலையாள திரைப்படங்களையும் இயக்கியவர் இயக்குனர் சித்திக். இவர் கடந்த சில நாட்களுக்கு முன்பு உடல்நலக்குறைவு காரணமாக மருத்துவமனையில் அனுமதிக்கப்பட்டிருந்த நிலையில் ஆகஸ்ட் 9ஆம் தேதி காலமானார். அவரது மறைவு தமிழ் மலையாள திரையுலகில் பெரும் அதிர்ச்சிக்கு உள்ளாக்கியது.
சித்திக் மறைவுக்கு நடிகர் சூர்யா தனது சமூக வலைத்தளத்தில் இரங்கல் அறிக்கை வெளியிட்டு இருந்தார் என்பதும் அதுமட்டுமின்றி சித்திக் வீட்டுக்கு நேரடியாகச் சென்று அவரது குடும்பத்தினருக்கு ஆறுதல் கூறினார் என்பதும் ஏற்கனவே அறிந்ததே.
இந்த நிலையில் தற்போது தளபதி விஜய், சித்திக் வீட்டுக்கு போன் செய்து அவரது குடும்பத்தினரிடம் தனது ஆழ்ந்த இரங்கலை தெரிவித்ததாக தகவல் வெளியாகியுள்ளது.