தளபதி விஜய் நடித்து வரும் ‘கோட்’ திரைப்படத்தின் படப்பிடிப்பு கடந்த சில மாதங்களாக விறுவிறுப்பாக நடைபெற்று வரும் நிலையில் தற்போது விஜய், வெங்கட் பிரபு உள்பட படக்குழுவினர் அனைவரும் இறுதி கட்ட படப்படிப்பிற்காக வெளிநாடு சென்றுள்ளனர் என்பதை ஏற்கனவே பார்த்தோம். இந்த நிலையில் இந்த படத்தின் படப்பிடிப்பு இன்னும் ஒரு சில நாட்களில் முடிவுக்கு வந்துவிடும் என்று எதிர்பார்க்கப்படும் நிலையில் அடுத்த கட்டமாக இந்த படத்தின் ப்ரோமோஷன் பணிகளை தொடங்க தயாரிப்பு தரப்பு முன்வந்துள்ளதாக கூறப்படுகிறது.

முதல் கட்டமாக ‘கோட்’ படத்தின் இசை வெளியீட்டு விழாவை பிரமாண்டமாக நடத்த திட்டமிட்ட நிலையில் ஆரம்ப கட்டத்திலேயே சென்னை வேண்டாம் என்று விஜய் முடிவு செய்துவிட்டதாக தெரிகிறது. ஏற்கனவே ’லியோ’ படத்தின் இசை வெளியீட்டு விழா சென்னையில் நடத்த திட்டமிட்ட நிலையில் கடைசி நேரத்தில் திடீரென காவல்துறை அனுமதி கிடைக்காததால் ரத்து செய்யப்பட்டது என்பதும் அதன் பிறகு ’லியோ’ திரைப்படத்தின் வெற்றி விழா மட்டுமே நடத்தப்பட்டது என்பது குறிப்பிடத்தக்கது.

இந்த நிலையில் ’லியோ’ போல் ’கோட்’ படத்திற்கும் பிரச்சனை வரலாம் என்று எதிர்பார்த்த விஜய் இந்த படத்தின் இசை வெளியீட்டு விழாவை மலேசியா அல்லது சிங்கப்பூரில் நடத்த திட்டமிட்டு இருப்பதாகவும் இந்த இரண்டு நாடுகளிலும் விஜய்க்கு அதிக அளவில் ரசிகர் கூட்டம் இருப்பதால் மிகப்பெரிய அளவில் பிரமாண்டமாக இந்த இசை வெளியீட்டு விழாவை நடத்தலாம் என்று முடிவு செய்திருப்பதாகவும் கூறப்படுகிறது. இது குறித்து இன்னும் அதிகாரப்பூர்வமான தகவல் வெளிவரவில்லை என்றாலும் படத்தின் இசை வெளியீட்டு விழா தமிழகத்தில் நடக்க வாய்ப்பு இல்லை என்றே கூறப்படுகிறது.