தளபதி விஜய் நடித்த ‘பீஸ்ட்’ திரைப்படம் ஏப்ரல் 13-ஆம் தேதி உலகம் முழுவதும் திரையரங்குகளில் பிரமாண்டமாக வெளியாகவுள்ளது. இந்த படத்தின் புரமோஷன் பணிகள் தற்போது விறுவிறுப்பாக நடைபெற்று வரும் நிலையில் திடீரென குவைத் நாட்டில் ‘பீஸ்ட்’ திரைப்படத்திற்கு தடை என அந்நாட்டு அரசு அறிவித்துள்ளதாக செய்திகள் வெளியாகி உள்ளது. இதனால் குவைத் நாட்டில் உள்ள விஜய் ரசிகர்கள் கடும் அதிர்ச்சி அடைந்துள்ளனர்.

‘பீஸ்ட்’ திரைப்படத்தில் பாகிஸ்தான் தீவிரவாதிகள் மற்றும் வன்முறை காட்சிகள் அதிகம் இருப்பதால் இந்த படத்திற்கு தடை விதிக்கப்பட்டுள்ளதாக அந்நாட்டின் செய்தி மற்றும் ஒளிபரப்பு துறை அமைச்சகம் விளக்கம் அளித்துள்ளதாக கூறப்படுகிறது .

ஏற்கனவே தமிழில் வெளியான விஷ்ணு விஷாலின் ’எஃப்ஐஆர்’ மற்றும் மலையாளத்தில் வெளியான துல்கர்சல்மானின் ’குரூப்’ ஆகிய திரைப்படங்களுக்கு குவைத் அரசு தடைவிதித்த நிலையில் தற்போது ‘பீஸ்ட்’ படத்திற்கும் தடை விதித்துள்ளது என்பது குறிப்பிடத்தக்கது.