கொரோனா பரவல் எதிரொலி: தளபதி 65 படக்குழு எடுத்த அதிரடி முடிவு!
- IndiaGlitz, [Friday,April 09 2021]
தளபதி விஜய் நடிப்பில் இயக்குனர் நெல்சன் இயக்கத்தில் உருவாக இருக்கும் ’தளபதி 65’ திரைப்படத்தின் படப்பிடிப்புக்காக விஜய் உள்பட படக்குழுவினர் ஜார்ஜியா சென்று உள்ளனர் என்பதும் அங்கு படப்பிடிப்பு விரைவில் தொடங்கும் என்பது குறிப்பிடத்தக்கது.
இந்த நிலையில் தற்போது கொரோனா வைரஸ் இரண்டாம் அலை இந்தியா உள்பட உலகம் முழுவதும் மிக வேகமாக பரவி வருகிறது. இதனை அடுத்து ஏற்கனவே திட்டமிட்டதை விட விரைவில் இந்த படத்தை முடிக்க படக்குழு முடிவு செய்திருப்பதாக கூறப்படுகிறது.
ஜார்ஜியாவில் இந்த படத்தின் மூன்றில் ஒரு பகுதி படப்பிடிப்பு நடத்தப்படும் என்றும் அதன்பிறகு சென்னை வந்து இந்த படத்தின் படப்பிடிப்பை விரைவில் முடிக்க திட்டமிடப்பட்டுள்ளதாகவும் கூறப்படுகிறது.
‘மாஸ்டர்’ திரைப்படம் ரிலீசுக்கு தயாராக இருந்தும் கொரோனா வைரஸ் காரணமாக பல மாதங்கள் காத்திருந்தது போல் ’தளபதி 65’ படத்திற்கு நிலைமை வரக்கூடாது என்பதற்காகவும் தியேட்டர்களுக்கு அதிக கெடுபிடிகள் பிறப்பிக்கப்படும் முன்னரே இந்த படத்தை ரிலீஸ் செய்ய வேண்டும் என படக்குழு திட்டமிடப்பட்டுள்ளதாக கூறப்படுகிறது. இதனால் ’தளபதி 65’ திரைப்படம் எதிர்பார்த்ததைவிட விரைவில் வெளியாகும் என்று கூறப்படுகிறது.