பிரபல இயக்குனர் ஏ.ஆர்.முருகதாஸ் இயக்கி வரும் 'தளபதி 62' படத்தின் படப்பிடிப்பு விறுவிறுப்பாக நடைபெற்று வரும் நிலையில் இந்த படம் ஒரு அரசியல் சம்பந்தப்பட்ட படம் என்று செய்திகள் வெளியாகி கொண்டிருக்கின்றது. இந்த நிலையில் இந்த படத்திற்காக சமீபத்தில் பிரமாண்டமான அரசியல் கட்-அவுட்டுக்கள் செய்யப்பட்டுள்ளது.

இந்த படத்தில் அரசியல்வாதி கேரக்டர்களில் நடிக்கும் பழ.கருப்பையா மற்றும் ராதாரவி ஆகியோர்களின் கட்-அவுட்டுக்கள் குறித்த ஸ்டில்கள் தற்போது இணையதளங்களில் வெளியாகியுள்ளது. இதில் ஒரு கட்சியின் பெயரை குறிப்பிட்டு அதன் இணைப்பு விழா என்றும் குறிப்பிட்டுள்ளது சமீபத்தில் நடந்த ஒரு கட்சியின் இணைப்பு விழாவை ஞாபகப்படுத்தும் வகையில் உள்ளது

மேலும் இந்த காட்சிக்காக சுமார் பத்தாயிரம் ஜூனியர் நடிகர்கள் வரவழைக்கப்பட்டதாகவும், பிரமாண்டமான அரசியல் கூட்டம் ஒன்றின் படப்பிடிப்பு நடந்து வருவதாகவும், செய்திகள் வெளிவந்துள்ளது.

இன்றைய அரசியல் நிலவரம் குறித்த வசனங்களும் காட்சிகளும் 'தளபதி 62' படத்தில் இருக்கும் என்று எதிர்பார்க்கப்படுவதால் ரிலீசுக்கு முன்போ அல்லது ரிலீசுக்கு பின்னரோ இந்த படத்திற்கு கடும் எதிர்ப்பு இருக்கலாம் என்று எதிர்பார்க்கப்படுகிறது.