'தலைவர் 169' படம் குறித்த மாஸ் தகவல்: ரஜினியுடன் இணையும் 3 பிரபலங்கள்!
- IndiaGlitz, [Tuesday,February 08 2022]
சூப்பர் ஸ்டார் ரஜினிகாந்த் நடித்த ’அண்ணாத்த’ திரைப்படம் கடந்த பொங்கல் தினத்தில் ரிலீஸ் ஆன நிலையில் அவருடைய அடுத்த படத்தை இயக்குவது யார்? தயாரிப்பு நிறுவனம் எது? என்பது குறித்த தகவல்கள் அவ்வப்போது கசிந்து வருகின்றன.
’கண்ணும் கண்ணும் கொள்ளையடித்தால்’ திரைப்படத்தை இயக்கிய தேசிங்கு பெரியசாமி, கே எஸ் ரவிக்குமார், நெல்சன் உட்பட பலருடைய பெயர்கள் ரஜினியின் அடுத்த படத்தை இயக்க இருப்பதாக கூறப்பட்டது.
இந்த நிலையில் தற்போது வந்த தகவலின் படி ரஜினியின் அடுத்த படத்தை அதாவது ’தலைவர் 169’ படத்தை நெல்சன் இயக்குவது கிட்டத்தட்ட உறுதி செய்யப்பட்டுள்ளதாகவும் இது குறித்த அறிவிப்பு விரைவில் வெளிவரும் என்றும் கூறப்படுகிறது.
மேலும் நெல்சன் படம் என்றாலே அனிருத் தான் இசை அமைப்பாளர் என்ற நிலையில் இந்த படத்தை சன் பிக்சர்ஸ் நிறுவனம் தயாரிக்க இருப்பதாக கூறப்படுகிறது. எனவே ரஜினியுடன் கலாநிதி மாறன், நெல்சன், அனிருத் ஆகிய 3 பிரபலங்கள் இணைய உள்ளதாகவும் இதுகுறித்த முறையான அறிவிப்பை சன் பிக்சர்ஸ் நிறுவனம் விரைவில் வெளியிடும் என்றும் கூறப்படுகிறது.