ஒரு நடிகருக்கு 50வது படம் என்பது மிகவும் முக்கியமான ஒன்று. கடந்த பத்து வருடங்களுக்கு முன்னர் ஒரு நடிகர் 100 படங்கள், 150 படங்கள் நடிப்பதெல்லாம் சாதாரணமாக இருந்தது. ஆனால் இன்றைக்கு இருக்கும் போட்டி உலகில் ஒரு நடிகர் 50 படங்கள் நடிக்கும் வரை ஃபீல்டில் இருப்பதே பெரிய விஷயம். அப்படி இருந்தாலும், அந்த 50வது படத்தை வெற்றிப்படமாக கொடுக்க வேண்டும் என்பதில் அனைவரும் மிகுந்த கவனத்துடன் இருப்பார்கள். அந்த வகையில் அஜீத்தின் 50வது படம் 'மங்காத்தா' மாபெரும் வெற்றிப்படமாக அமைந்தது என்பது குறிப்பிடத்தக்கது.

இந்நிலையில் இன்று 'மங்காத்தா' திரைப்படம் ரிலீஸாகி சரியான நான்கு வருடங்கள் நிறைவு பெறுகின்றது. கடந்த 2011ஆம் ஆண்டு ஆகஸ்ட் 31ஆம் தேதி ரிலீசான 'மங்காத்தா' சூப்பர் ஹிட் வெற்றியை பெற்றது. வெங்கட்பிரபுவின் விறுவிறுப்பான திரைக்கதை, யுவன்ஷங்கர் ராஜாவின் அபாரமான இசை, அஜீத்தின் ஆர்ப்பாட்டமான நடிப்பு, அர்ஜூனின் கம்பீரமான போலீஸ் கெட்டப், த்ரிஷா மற்றும் ராய்லட்சுமியின் கவர்ச்சி மற்றும் பிரேம்ஜியின் காமெடி என இந்த படத்தில் ஒரு வெற்றிப்படத்திற்கு தேவையான அனைத்து அம்சங்களும் இருந்தன.

யுவன்ஷங்கர் ராஜாவின் துள்ளலான பாடல்கள், அஜித்தின் மணி...மணி...மணி..என்ற வசனம், கார் சேசிங், கிரிக்கெட் சூதாட்டம், வில்லன்களுக்கு வில்லனாக நடித்திருந்த அஜீத்தின் கேரக்டர், கிளைமாக்ஸில் அர்ஜூன் உண்மையில் யார்? என்ற டுவிஸ்ட் ஆகியவை அஜீத் ரசிகர்களை மட்டுமின்றி அனைத்து தரப்பினர்களையும் கவர்ந்தது.

சூப்பர் ஸ்டார் ரஜினி நடித்த 'எந்திரன்' படத்திற்கு பின்னர் அதிக வசூல் செய்த படம் 'மங்காத்தா' தான் என்ற பெருமையையும் இந்த படம் பெற்றது. உலகம் முழுவதும் சுமார் 1000 திரையரங்குகளில் ரிலீஸ் ஆன இந்த படம் முதல் வாரத்தில் மட்டும் சுமார் ரூ.300 மில்லியன் வசூல் செய்தது. சென்னையில் மட்டும் இந்த படம் 19 நாட்களில் ரூ.65 மில்லியன் வசூல் செய்தது. அஜீத் ரசிகர்கள் மங்காத்தா ரிலீஸ் ஆகி நான்கு வருடங்கள் ஆனதையொட்டி #4YearsOfBlockbusterMankatha என்ற ஹேஷ்டேக்கை சமூக வலைத்தளத்தில் உருவாக்கி அதையும் டிரெண்டுக்கு கொண்டு வந்துள்ளனர் என்பது குறிப்பிடத்தக்கது. தற்போது அஜீத் நடித்து வரும் 'தல 56' படமும் மங்காத்தா' போன்று சூப்பர் ஹிட் ஆக நமது அட்வான்ஸ் வாழ்த்துக்கள்.