தமிழ் ஹீரோவின் படப்பிடிப்பு தாய்லாந்து நாட்டில் நடைபெற்றுக் கொண்டிருந்த நிலையில் அங்குள்ள பொதுமக்கள் படக்குழுவினரை கல்லால் எறிந்து விரட்டியடித்த சம்பவம் பெரும் பரபரப்பை ஏற்படுத்தி உள்ளது .

இயக்குனர் ஷங்கர் இயக்கிய ’பாய்ஸ்’ என்ற திரைப்படத்தில் அறிமுகமாகி அதன் பின் பல திரைப்படங்களில் நடித்த நடித்தவர் நடிகர் பரத். இவர் தற்போது ’ஆக்சன் 22’ என்ற திரைப்படத்தில் நடித்து வருகிறார். இந்த படம் கடந்த 2018 ஆம் ஆண்டு தாய்லாந்து நாட்டில் திடீரென பெய்த கனமழை காரணமாக வெள்ளம் ஏற்பட்டபோது, அங்கு உள்ள குகை ஒன்றில் 12 சிறுவர்கள் சிக்கிக் கொண்டதை மீட்பது குறித்த உண்மை கதை என்பது குறிப்பிடத்தக்கது.

சந்திரன் திக்கொடி என்பவர் இயக்கத்தில் உருவாகி வரும் இந்தப் படத்தில் சிறுவர்களை காப்பாற்றும் அதிகாரியாக பரத் நடித்து வருகிறார். இந்த படத்தின் படப்பிடிப்பை சம்பவம் நடந்த குகையில் எடுத்தால் தத்ரூபமாக இருக்கும் என முடிவு செய்த படக்குழுவினர் தாய்லாந்து அரசின் அனுமதியைப் பெற்று அங்கு படப்பிடிப்பை நடத்தி வந்தனர். இந்த நிலையில் திடீரென அந்த பகுதி மக்கள் தங்களுக்கு பணம் கொடுத்தால் மட்டுமே படப்பிடிப்பை நடத்த விடுவோம் என்று தகராறு செய்தனர். இதனை அடுத்து படக்குழுவினர் பணம் தந்த நிலையில் அங்கு இருந்த இன்னொரு பிரிவினரும் பணம் கேட்டு தகராறு செய்தனர். படக்குழுவினர் பணம் தர முடியாது என்று சொன்னதால் அவர்கள் படக்குழுவினர் மீது கற்களை எறிந்ததால் பரபரப்பு ஏற்பட்டது.

இதனையடுத்து தாய்லாந்து குகை போலவே ஹைதராபாத்தில் ராமோஜிராவ் ஸ்டுடியோவில் செட் அமைத்து படப்பிடிப்பு நடத்த முடிவு செய்த படக்குழுவினர் மீண்டும் இந்தியா திரும்ப திட்டமிட்டுள்ளனர். இந்த நிலையில் தாய்லாந்து சுற்றுலாத்துறை தகுந்த பாதுகாப்பு தருவதாகவும் இங்கேயே படப்பிடிப்பை நடத்துங்கள் என்றும் கேட்டுக் கொண்டதாகவும் கூறப்படுகிறது. படக்குழுவினர் என்ன முடிவு எடுக்கப் போகிறார்கள் என்பதை பொறுத்திருந்துதான் பார்க்க வேண்டும்.