ஜிஎஸ்டி மற்றும் கேளிக்கை வரி பிரச்சனை தொடர்பாக ஒருபக்கம் தமிழ் திரைப்பட வர்த்தக சபை தலைவர் அபிராமி ராமநாதன் முதல்வர் எடப்பாடி பழனிச்சாமி மற்றும் தமிழக அமைச்சர்களை சந்தித்து பேசி வரும் நிலையில் இன்னொரு பக்கம் தமிழ் திரைப்பட தயாரிப்பாளர் சங்கத்தலைவர் விஷாலும் இதுகுறித்த நடவடிக்கையில் களமிறங்கியுள்ளார்.

தமிழக தகவல் மற்றும் விளம்பரத்துறை அமைச்சர் கடம்பூர் ராஜூ அவர்களை விஷால் சந்தித்து தற்போதைய தமிழ் சினிமாவுலகின் பிரச்சனைகள் குறித்தும் திரைத்துறையினர்களின் அவசிய தேவை குறித்தும் பேச்சுவார்த்தை நடத்தியுள்ளார்.

விஷாலின் கோரிக்கைகள் அனைத்தையும் பரிவுடன் கேட்ட அமைச்சர் கடம்பூர் ராஜூ இதுகுறித்து முதல்வருடன் கலந்து பேசி விரைவில் நல்ல முடிவு அறிவிப்பதாக கூறியுள்ளார்.

மேலும் இன்னும் சில நிமிடங்களில் தமிழக முதல்வர் எடப்பாடி பழனிச்சாமி அவர்களையும் விஷால் மற்றும் தயாரிப்பாளர் சங்க நிர்வாகிகள் சந்திக்கவுள்ளதாகவும், இந்த சந்திப்பின்போது கேளிக்கை வரியை கைவிடும்படி முதல்வரிடம் விஷால் குழுவினர்கள் கேட்டுக்கொள்வார்கள் என்றும் எதிர்பார்க்கப்படுகிறது.