கோலிவுட் திரையுலகின் பழம்பெரும் தயாரிப்பாளர் கலைஞானம். ஆரம்ப காலகட்டத்தில் ரஜினிகாந்த் வில்லன் வேடங்களில் நடித்து கொண்டிருந்தபோது, அவரை துணிச்சலாக ஹீரோவாக மாற்றி 'பைரவி' என்ற படத்தை தயாரித்தவர் கலைஞானம். இந்த படத்தில் ரஜினிக்கு பதில் வேறு நடிகரை ஒப்பந்தம் செய்யுமாறும் பல திரையுலக பிரபலங்கள் கூறியும் விடாப்பிடியாக ரஜினிதான் ஹீரோ என்று உறுதியாக இருந்தவர் இவர். இந்த படம் நல்ல வரவேற்பையும் பெற்றது.

இந்த நிலையில் கடந்த சில மாதங்களாக கலைஞானம் அவர்கள் உடல்நலமின்றி இருந்து வருவதை கேள்விப்பட்ட தயாரிப்பாளர் சங்க தலைவர் விஷால், அவருடைய வீட்டிற்கு நேரடியாக சென்று அவரிடம் உடல்நலம் குறித்து விசாரித்தார். அவருடன் தயாரிப்பாளர் சங்க செயலாளர் கதிரேசனும் உடன் சென்றார். கலைஞானம் அவர்களின் உடல்நலம் தேற தன்னால் முடிந்த அனைத்து உதவிகளையும் செய்ய தயார் என்று அவரிடம் விஷால் கூறியதாக செய்தி வெளிவந்துள்ளது.

கலைஞானம் தயாரிப்பாளர் மட்டுமின்றி நல்ல திரைக்கதை ஆசிரியர் என்பதும், கே.பாக்யராஜின் 'இது நம்ம ஆளு' உள்பட ஒருசில படங்களில் இவர் நடித்துள்ளார் என்பதும் குறிப்பிடத்தக்கது.