கடந்த சில மாதங்களாக சின்னத்திரை கலைஞர்கள் தற்கொலை செய்து கொள்ளும் சம்பவங்கள் அதிகமாகி வரும் நிலையில் நேற்று தெலுங்கு சின்னத்திரையை சேர்ந்த தேஜஸ்வனி என்பவர் தூக்கில் தொங்கி தற்கொலை செய்து கொண்ட அதிர்ச்சி தகவல் வெளிவந்துள்ளது

தெலுங்கு சேனல் ஒன்றில் செய்தி வாசிப்பவராகவும் தொகுப்பாளினியாகவும் இருந்தவர் தேஜஸ்வனி. இவர் ஐடி ஊழியரான பவன்குமார் என்பவரை காதல் திருமணம் செய்து கொண்டார். இருவரும் வெவ்வேறு ஜாதி என்பதால் இருவரின் பெற்றோர்கள் இந்த திருமணத்தை ஏற்று கொள்ளவில்லை. இந்த நிலையில் ஒருசில ஆண்டுகள் துபாயில் வசித்த இந்த தம்பதிகள் பின்னர் சமீபத்தில் இந்தியா திரும்பினர்

இந்த நிலையில் நேற்று தேஜஸ்வனி தன்னுடைய அறையை உள்பக்கமாக பூட்டி கொண்டு நீண்ட நேரமாக திறக்கவில்லை. இதனால் அவருடைய மாமியார் அதிர்ச்சி அடைந்து பக்கத்து வீட்டுக்காரர்களின் உதவியோடு கதவை உடைத்து பார்த்தபோது தேஜஸ்வனி தூக்கில் தொங்கி மரணம் அடைந்திருந்தார்.

இதுகுறித்து தகவல் அறிந்தவுடன் காவல்துறையினர் சம்பவ இடத்திற்கு வந்து தேஜஸ்வனி எழுதிய லட்டரை கைப்பற்றினர். அதில் தன்னுடைய கணவர் இன்னொரு பெண்ணுடன் தொடர்பு வைத்திருந்ததை அறிந்ததால் அதிர்ச்சி அடைந்து இந்த முடிவை எடுத்துள்ளதாக எழுதியிருந்தது. இதனையடுத்து காவல்துறையினர் தேஜஸ்வனியின் கணவர் மீது வழக்குப்பதிவு செய்துள்ளனர்.