தெலுங்கானா மாநிலத்தில் 25 வயது இளைஞர் ஒருவர் ஒரே நாளில் இரண்டு பெண்களுக்கு தாலி கட்டி திருமணம் செய்து கொண்ட சம்பவம் காத்து வாக்குல ரெண்டு காதல் என நெட்டிசன்களை விமர்சனம் செய்ய வைத்துள்ளது.

தெலுங்கானா மாநிலத்தைச் சேர்ந்த கொத்தகுடேம் மாவட்டத்தைச் சேர்ந்த சட்டிபாபு என்ற இளைஞர் கடந்த சில ஆண்டுகளுக்கு முன்னர் தன்னுடன் படிக்கும் கல்லூரி மாணவி ஸ்வர்ண குமாரி என்பவரை காதலித்தார். பின்னர் அவர்களுக்கு ஒரு குழந்தை பிறந்தது. திருமணத்திற்கு முன்பே குழந்தை பிறந்தாலும் இருவரும் ஒருவரை ஒருவர் திருமணம் செய்து கொள்ள வேண்டாம் என முடிவு செய்து தனித்தனியாக வாழ்ந்தனர்.

இந்த நிலையில் சுனிதா என்ற பெண்ணை காதலித்த சட்டிபாபு அவருடன் நெருக்கமாக பழகியதை அடுத்து சுனிதாவுக்கும் ஒரு குழந்தை பிறந்தது. இந்த நிலையில் சட்டிபாபுவின் முதல் காதல் குறித்து சுனிதா தெரிந்து கொண்டார்.. இதனை அடுத்து காதலியான ஸ்வர்ணகுமாரியை தன்னுடனே அழைத்து வந்ததை அடுத்து இருவரும் ஒரே வீட்டில் வாழ்ந்து வந்தனர்.

இந்த நிலையில் சட்டிபாபுவின் பெற்றோர் இரண்டு காதலையும் ஏற்றுக்கொண்டதை அடுத்து ஒரே நாளில் சட்டிபாபுவுக்கு இரண்டு பெண்களுடன் திருமணம் செய்ய முடிவு செய்தனர். இரண்டு பெண்களுடன் சட்டிபாபுவுக்கு திருமணம் என்று அழைப்பிதழ்கள் வெளியாகி பரபரப்பை ஏற்படுத்திய நிலையில் ஒரே நாளில் இரண்டு பெண்களை திருமணம் செய்தால் சட்டிபாபு கைது செய்யப்படலாம் என்ற செய்தியும் பரவியது.

இதனை அடுத்து இரவோடு இரவாக உறவினர்கள் மற்றும் நண்பர்கள் மத்தியில் சட்டிபாபு ஸ்வர்னகுமாரி, சுனிதா ஆகிய இருவருக்கும் தாலி கட்டி திருமணம் செய்து கொண்டார். திருமணத்துக்கு முன்பே இரண்டு பெண்களை காதலித்து இரண்டு பெண்கள் மூலம் குழந்தை பெற்றுக் கொண்ட சட்டிபாபு ஒரே நேரத்தில் இருவரையும் பெற்றோர்கள் முன்னிலை திருமணம் செய்து கொண்ட சம்பவம் பெரும் பரபரப்பை ஏற்படுத்தி உள்ளது. இது சட்டப்படி சாத்தியமா? சட்டிபாபு மீது காவல்துறை நடவடிக்கை எடுக்குமா? என்பதை பொறுத்திருந்து தான் பார்க்க வேண்டும்.