TS Group-1: తెలంగాణ గ్రూప్1 నోటిఫికేషన్ రద్దు.. TSPSC కీలక నిర్ణయం..
- IndiaGlitz, [Monday,February 19 2024]
తెలంగాణ గ్రూప్-1 నోటిఫికేషన్ మరోసారి రద్దైంది. గత ప్రభుత్వం విడుదల చేసిన పాత నోటిఫికేషన్‌ను రద్దు చేస్తున్న TSPSC బోర్డు ప్రకటించింది. రాష్ట్రంలో కీలకమైన పోస్టులను భర్తీ చేసేందుకు గ్రూప్ 1 పరీక్షలు నిర్వహిస్తారు. ఇందులో జాయింట్ కలెక్టర్, డీఎస్పీ స్థాయి పోస్టులు ఉంటాయి. అయితే తెలంగాణ ఏర్పడిన దగ్గరి నుంచి ఇంతరవకు ఒక్క గ్రూప్-1 పోస్టు కూడా భర్తీ కాలేదు. గత బీఆర్ఎస్ ప్రభుత్వం 2022లో 503 పోస్టుల భర్తీకి నోటిఫికేషన్ విడుదల చేసింది. అయితే అదే ఏడాది అక్టోబర్‌లో తొలిసారి ప్రిలిమ్స్ పరీక్ష నిర్వహించారు. తర్వాత ఫలితాలు కూడా విడుదల చేశారు. కానీ అనూహ్యంగా ప్రిలిమ్స్ ఎగ్జామ్ పేపర్ లీక్ అయిందనే ఆరోపణలు భగ్గుమన్నాయి. దీంతో ఈ ఎగ్జామ్ రద్దు చేశారు.
అనంతరం మరోసారి అప్పటి బీఆర్ఎస్ ప్రభుత్వం గ్రూప్ 1 ప్రిలిమినరీ ఎగ్జామ్ నిర్వహించింది. అయితే 2023 జూన్ 11న నిర్వహించిన ఈ పరీక్షలోనూ అవకతవకలు జరిగాయని, నిబంధనలు సరిగ్గా పాటించలేదని మరోసారి రద్దు చేసింది టీఎస్పీఎస్సీ. దీంతో అభ్యర్థులు విషయం హైకోర్టుకు వెళ్లడంతో ఎగ్జామ్ రద్దు నిర్ణయాన్ని న్యాయస్థానం సమర్థించింది. హైకోర్టు నిర్ణయాన్ని సవాల్ చేస్తూ సుప్రీంకోర్టును సైతం బీఆర్ఎస్ ప్రభుత్వం ఆశ్రయించింది. కేసు విచారణలో ఉండగానే తెలంగాణ అసెంబ్లీ ఎన్నికలు రావడం కాంగ్రెస్ పార్టీ అధికారంలోకి రావడం చకచకా జరిగిపోయాయి.
కాంగ్రెస్ అధికారంలోకి రాగానే టీఎస్పీఎస్సీ బోర్డు ప్రక్షాళనపై దృష్టి పెట్టారు. చైర్మన్‌తో పాటు మొత్తం బోర్డు సభ్యులను తొలగించారు. అనంతరం కొత్త బోర్డును ఏర్పాటుచేశారు. బోర్డు చైర్మన్‌గా మాజీ డీజీపీ మహేందర్ రెడ్డిని నియమించారు. అలాగే గత ప్రభుత్వం సుప్రీంకోర్టులో హైకోర్టు తీర్పును సవాల్ చేసిన పిటిషన్‌ను వెనక్కి తీసుకుంది. అంతేకాకుండా ఇటీవల మరో 60 పోస్టులకు కూడా రేవంత్ సర్కార్ అనుమతి ఇచ్చింది. దీంతో కొత్త పోస్టులతో కలిపి మొత్తం 563 పోస్టుల భర్తీకి త్వరలోనే టీఎస్పీఎస్సీ మరో నోటిఫికేషన్ విడుదల చేయనుంది.