పాట చిత్రీక‌ర‌ణ‌లో..'తేజ్ ఐ లవ్ యు'
- IndiaGlitz, [Thursday,May 03 2018]
ప్రేమ‌క‌థా చిత్రాల స్పెషలిస్ట్ ద‌ర్శ‌కుడు ఎ.కరుణాకరన్.. ప్రేమకథలను తనదైన శైలిలో వెండి తెరపై చూపడంలో నేర్పరి. ప్రస్తుతం మెగాహీరో సాయిధరమ్ తేజ్, కేర‌ళ కుట్టి అనుపమ పరమేశ్వరన్ జంటగా ‘తేజ్ ఐ లవ్ యు’ చిత్రాన్ని తెరకెక్కిస్తున్నారు ఈ టాలెంటెడ్ డైరెక్టర్. పూర్తి ప్రేమకథగా రూపుదిద్దుకుంటున్న ఈ చిత్రంలో.. తేజు, అనుపమ జంట చూడ ముచ్చటగా ఉందని కాంప్లిమెంట్స్ వస్తున్నాయి.
ప్రస్తుతం ఈ చిత్రం.. పారిస్‌లో చిత్రీకరణ జరుపుకుంటోంది. ఇందులో భాగంగా నాయకానాయికలపై ఒక రొమాంటిక్ సాంగ్‌ను షూట్ చేస్తున్నారు. లవ్ స్టోరీస్‌కి తనదైన మార్కు సంగీతం అందించి ఆకట్టుకునే గోపిసుందర్ ఈ సినిమాకి కూడా త‌న మార్క్ సంగీతం అందిస్తున్నార‌ని చిత్ర వ‌ర్గాలు పేర్కొంటున్నాయి. కాగా.. మంగళవారం విడుదలైన టీజ‌ర్‌ను బ‌ట్టి ఈ సినిమా పాటలు ఏ విధంగా ఉండబోతున్నాయోనని శ్రోతలు, అభిమానులు ఎంతో ఆస‌క్తిగా ఎదురు చూస్తున్నారు. క్రియేటివ్ క‌మ‌ర్షియ‌ల్స్‌ పతాకంపై కె.ఎస్.రామారావు నిర్మిస్తున్న ఈ సినిమా జూన్ 14న ప్రపంచవ్యాప్తంగా విడుదల కానుంది.