கடந்த சில ஆண்டுகளாக விபரீதமான சேலஞ்சுகள் உலகம் முழுவதும் வைரலாகி விபத்துக்களும் உயிரிழப்புகளும் ஏற்பட்டு வரும் நிலையில் தற்போதும் அதேபோன்று 'பேர்டு பாக்ஸ் சேலஞ்ச்' என்ற ஆபத்தான சேலஞ்ச் பரவி வருகிறது.

ஐஸ்பக்கெட் சேலஞ்ச், கிகி சேலஞ்ச் ஆகியவற்றை தொடர்ந்து தற்போது வைரலாகும் இந்த பேர்டு பாக்ஸ் சேலஞ்ச்சில் கண்களைக் கட்டிக் கொண்டு வேகமாக ஓடி செல்ல வேண்டும். அப்போது எதிரே எந்த பொருள் இருந்தாலும் அதில் சென்று முட்டிக் கொள்ளவேண்டும் என்பதே இந்த சேலஞ்ச் ஆகும். இந்த சேலஞ்சை ஒருசிலர் காரில் செல்லும்போது செய்வதால் அவ்வப்போது விபத்துக்களும் நடந்து வருகிறது.

இந்த நிலையில் அமெரிக்காவில் உள்ள Layton என்ற பகுதியில் 17 வயது இளம்பெண் ஒருவர் இந்த 'பேர்டு பாக்ஸ் சேலஞ்ச்சில் கண்களை மூடிக்கொண்டு காரை ஓட்டியதால் அவர் பாதை மாறி சென்றதோடு, எதிரே ஒரு வந்த ஒரு காருடன் மோதியுள்ளார். இந்த விபத்தில் இரண்டு கார்களும் சேதமடைந்த போதிலும் யாருக்கும் காயம் ஏற்படவில்லை. இதுகுறித்து போலீசார் வழக்குப்பதிவு செய்து விசாரணை செய்து வருகின்றனர். இதுபோன்ற ஆபத்தான சேலஞ்ச்களில் இளைஞர்கள் ஈடுபட வேண்டாம் என்று போலீசார் கேட்டுக்கொண்டுள்ளனர்.