వల్లభనేని వంశీ.. ఇలా ట్విస్ట్ ఇచ్చాడేంటి!?
- IndiaGlitz, [Saturday,October 26 2019]
టీడీపీ ఎమ్మెల్యే వల్లభనేని వంశీ ఇస్తున్న ట్విస్ట్‌లకు అసలేం జరుగుతోందో తెలియక అటు తెలుగు తమ్ముళ్లు.. ఇటు కార్యకర్తలు, అభిమానులు కంగుతింటున్నారు. మొన్న టీడీపీ అధినేత చంద్రబాబుతో.. రెండ్రోజులుగా బీజేపీ ఎంపీ సుజనా చౌదరి వెంటే ఉండటం.. ఇవాళ ఏపీ సీఎం వైఎస్ జగన్ మోహన్‌రెడ్డితో భేటీ కావడం ఇలా వరుస భేటీలతో అసలు ఈయన ఏ పార్టీలోకి వెళ్తారు..? ఏ పార్టీలోకి వెళ్లాలని అనుకుంటున్నారు..? అసలు టీడీపీలో ఉంటారా..? ఉండరా..? అనేది మాత్రం ఎవరికీ అర్థం కావట్లేదు.
రెండ్రోజులుగా సుజనాచౌదరితో కలిసే వంశీ తిరగడంతో ఆయనే దగ్గరుండి మరీ బీజేపీలో తీసుకెళ్తారని అందరూ అనుకున్నారు. అన్నీ అనుకున్నట్లు జరిగితే దీపావళి తర్వాత ఢిల్లీ వేదికగా వంశీ కాషాయ కండువా కప్పుకుంటారని ప్రచారం జరిగింది. అయితే ఈ వార్తలు పుట్టుకొచ్చిన కొన్ని గంటలకే ఏపీ సీఎం వైఎస్ జగన్ మోహన్‌రెడ్డిని కలిశారు. వంశీకి అత్యంత సన్నిహితుడు, మంత్రి కొడాలి నాని దగ్గరుండి మరీ తీసుకెళ్లడంతో టీడీపీ, వైసీపీలో పెద్ద ఎత్తున చర్చనీయాంశమయ్యారు. దీంతో మిత్రుడే దగ్గరుండి వైసీపీ కండువా కప్పిస్తారా..? అని అందరూ అనుకున్నారు.
ఏదైతేనేం పార్టీ మారడం మాత్రం పక్కా అని తెలుస్తోంది. అయితే ఏ పార్టీ అన్నది మాత్రం తెలియరాలేదు. అసలు ఈ విషయంలో వంశీకి అయినా క్లారిటీ ఉందా లేదా అన్నది తెలియట్లేదు. అయితే వంశీ మనసులో ఏముంది..? ఏ పార్టీలోకి వెళ్తారు..? అనేది తెలియాలంటే మరికొన్ని రోజుల్లో తేలిపోనుంది.