కాకినాడ ఎంపీ అభ్యర్థిగా టీటైమ్ యజమాని తంగెళ్ల ఉదయ్ శ్రీనివాస్‌ను జనసేన అధినేత పవన్ కళ్యాణ్ ప్రకటించిన సంగతి తెలిసిందే. ఇంతవరకు బాగానే ఉన్నా ఈ సందర్భంగా పవన్ చేసిన వ్యాఖ్యలు మరోసారి అసంతృప్తికి కారణమయ్యేలా కనిపిస్తున్నాయి. ఎందుకంటే పిఠాపురం పోటీ చేస్తానని పవన్ ప్రకటించడంతో అక్కడి టీడీపీ నేతలు తీవ్ర ఆగ్రహానికి గురయ్యారు. మాజీ ఎమ్మెల్యే, టీడీపీ నేత ఎస్వీఎస్ఎన్ వర్మ అనుచరులు పెద్ద ఎత్తున రోడ్ల పైకి వచ్చి నిరసన తెలిపారు. దీంతో పార్టీ అధినేత చంద్రబాబు వర్మకు ఎమ్మెల్సీ ఇస్తామని హామీ ఇచ్చారు.

దీంతో వివాదం సద్దుమణిగడంతో పవన్ కళ్యాణ్ తరుఫున వర్మ ప్రచారం కూడా ప్రారంభించారు. అయితే అంతా బాగుందనుకున్న తరుణంగా పవన్ చేసిన వ్యాఖ్యలు మరోసారి ఇబ్బందులకు గురిచేసేలా ఉన్నాయి. తన కోసం, పార్టీ కోసం ఎంతో త్యాగం చేసిన ఉదయ్‌కు కాకినాడ ఎంపీ టికెట్ కేటాయించినట్లు చెప్పారు. అయితే ప్రధాని మోదీ, అమిత్ షా సూచిస్తే మాత్రం తాను ఎంపీగా బరిలోకి దిగుతానని.. పిఠాపురం నుంచి ఉదయ్ పోటీ చేస్తారని పేర్కొన్నారు. ఇప్పుడు ఈ వ్యాఖ్యలే జనసేనానికి లేనిపోని తలనొప్పులు తెచ్చిపెట్టాయి.

పవన్ వ్యాఖ్యలపై టీడీపీ నేత వర్మ తాజాగా స్పందించారు. పొత్తులో భాగంగా పవన్ కల్యాణ్‌ కోసం సీటు త్యాగం చేశానని.. ఆయన పోటీ చేయకపోతే తాను బరిలో ఉంటానని స్పష్టంచేశారు. 20 ఏళ్ల నుంచి టీడీపీ కోసం పనిచేస్తున్నానని.. చంద్రబాబు ఆదేశాలతోనే పవన్ కోసం సీటును వదులుకున్నానని చెప్పుకొచ్చారు. ఒకవేళ పవన్ కళ్యాణ్ కాకినాడ ఎంపీగా పోటీచేస్తే పిఠాపురం టికెట్ తనదేనని.. తప్పకుండా పోటీ చేస్తానని వెల్లడించారు.

రాజకీయాల్లో ఏదైనా మాట్లాడేటప్పుడు ఆచితూచి మాట్లాడాలని చెబుతూ ఉంటారు. అందులోనూ పొత్తులో ఉన్నప్పుడు సీట్లు విషయం లాంటి సున్నితమైన అంశాలు బహిరంగంగా వ్యాఖ్యానించకూడదు. ఏదైనా ఉంటే ముందుగానే కూటమి సభ్యులతో మాట్లాడాలని.. ఇలా బహిరంగ వ్యాఖ్యలు సరికాదని రాజకీయ విశ్లేషకులు అభిప్రాయపడుతున్నారు. ఇప్పుడే పిఠాపురంలో అంతా సద్దుమణిగిందని అనుకుంటున్న తరుణంలో పవన్ కళ్యాణ్ వ్యాఖ్యలు మళ్లీ అసమ్మతిని రెచ్చగొట్టే ప్రమాదం ఉందంటున్నారు.