యూత్ స్టార్ విజయ్ దేవరకొండ, ప్రియాంక జవల్కర్ జంటగా నటించిన మూవీ ‘టాక్సీవాలా’. డెబ్యూ డైరెక్ట‌ర్ రాహుల్ సాంకృత్య‌న్‌ దర్శకత్వం వహించిన ఈ సినిమాని జిఏ2 పిక్చర్స్, యు.వి క్రియేషన్స్ సంయుక్తంగా నిర్మించాయి. సైంటిఫిక్ థ్రిల్లర్‌గా రూపొందిన ఈ చిత్రంలో మాళవికా నాయర్ ఓ కీలక పాత్రలో నటించారు. ‘అర్జున్ రెడ్డి’ తర్వాత విజయ్ నటించిన చిత్రం కావడంతో ఈ సినిమాపై భారీ అంచనాలే ఉన్నాయి. దీంతో పాటు రెండు వారాల క్రితం విడుదలైన టీజ‌ర్ కూడా ఈ సినిమాపై అంచనాలను తారా స్థాయికి తీసుకుని వెళ్ళింది.

ప్రస్తుతం నిర్మాణానంతర పనులు జరుపుకుంటున్న ఈ సినిమా విడుదలకు సిద్ధంగా ఉంది. అయితే.. ఇప్పుడు ఈ చిత్రం విడుదల వాయిదా పడినట్టు సమాచారం. నిర్మాణానంతర పనులలో భాగంగా విఎఫ్ఎక్స్ పనులు ఇంకా పూర్తి కాకపోవడంతో.. ఈ చిత్రాన్ని ముందు అనుకున్నట్టుగా ఈ నెల 18న కాకుండా.. జూన్ 14న విడుదల చేయబోతున్నట్టు టాక్ వినిపిస్తోంది. త్వ‌ర‌లోనే విడుద‌ల తేదిపై క్లారిటీ వ‌స్తుంది.