ఎవరో ఒకరిపై విమర్శలు చేయడం ద్వారా వీలైనంత లబ్ది పొందాలని శ్రీరెడ్డి తాపత్రయ పడుతున్నట్టు తెలుగు, తమిళ ప్రజలు సులభంగా గ్రహిస్తున్నారు. తెలుగు చిత్ర పరిశ్రమలో కొన్ని రోజుల క్రితం అలజడి సృష్టించి, తరవాత తమిళ రాజధాని చెన్నైకి మకాం మార్చిన సంగతి తెలిసిందే. రెండు మూడు తమిళ చిత్రాల్లో శ్రీరెడ్డి నటిస్తున్నారు. ఇప్పుడు ఆమె ఎన్ని విమర్శలు చేసినా తెలుగు చిత్ర పరిశ్రమలో ఎవరూ పట్టించుకోవడం లేదు గనుక... తమిళ సినీ ప్రముఖుల్ని టార్గెట్ చేసినట్టున్నారు.

ఆదివారం నడిఘర్ సంఘం, తమిళ చలనచిత్ర నిర్మాతల మండలిలో చక్రం తిప్పుతున్న విశాల్ మీద పడ్డారు. వరుస ట్వీట్స్ చేశారు. అయితే ఎక్కడా విశాల్ పేరు ప్రసావించలేదు. కానీ, శ్రీరెడ్డి ట్వీట్స్ చదివితే.. ఆమె విశాల్‌ని టార్గెట్ చేశారని సులభంగా అర్థమవుతుంది. "తమిళ నిర్మాతలు నీపై నమ్మకం పెట్టుకున్నారు. నీకు ఓటు వేశారు. కానీ, నువ్వు నీ అధికారాన్ని దుర్వినియోగం చేస్తున్నావ్. డబ్బు కోసం చాలామంది తమిళ నిర్మాతలను వేధిస్తున్నావ్. ఒక్క విషయం గుర్తు పెట్టుకో... నిర్మాతలకు కోపం వచ్చేవరకూ నువ్వు సేఫ్. ఒక్కసారి వాళ్లకు కోపం వస్తే... హీరోగా నీ సీటు, నీ ఎమ్మెల్యే సీటు, అన్నీ గల్లంతు అవుతాయి" అని శ్రీరెడ్డి ట్వీట్ చేశారు. వీటిపై విశాల్ ఎలా స్పందిస్తారో చూడాలి.