‘శభాష్ మిథు’ కోసం బ్యాట్ పట్టిన తాప్సి..
- IndiaGlitz, [Thursday,January 28 2021]
ప్రస్తుత సినీ ఇండస్ట్రీలో బయోపిక్‌ల ట్రెండ్ నడుస్తోంది. ప్రముఖ ఆటగాళ్ల బయోపిక్‌లు వరుసగా లైన్‌లో ఉన్నాయి. ఇప్పటికే సైనా నెహ్వాల్ బయోపిక్ పూర్తైన విషయం తెలిసిందే. తాజాగా టీమిండియా మహిళా క్రికెట్ కెప్టెన్ మిథాలీ రాజ్ బయోపిక్ కూడా సిద్ధమవుతోంది. రాహుల్ దోల్ కియా దర్శకత్వంలో ‘శభాష్ మిథు’ అనే టైటిల్‌తో ఈ బయోపిక్ రూపొందుతోంది. ఈ చిత్రంలో మిథాలీ రాజ్ పాత్రలో తాప్సి నటిస్తోంది. ఈ సినిమాను రెండేళ్ల క్రితమే ప్రకటించినప్పటికీ కరోనా మహహ్మారి కారణంగా ఆలస్యమైంది.
ఈ బయోపిక్ కోసం అమ్మడు ఇప్పటికే బ్యాట్ పట్టి ప్రాక్టీస్ మొదలు పెట్టేసింది. తాజాగా ప్రారంభం కానున్న షూటింగ్ కోసం మిథాలీగా తనను తాను సిద్ధం చేసుకుంటోంది. దీనిపై తాజాగా స్పందించిన తాప్సి.. సగం వర్క్ పూర్తయిందని తెలిపింది. ప్రస్తుతం బ్యాట్, బాల్‌తో ప్రాక్టీస్ స్టార్ట్ అయ్యిందని.. ఇంకా నేర్చుకోవాల్సింది చాలా ఉందని తెలిపింది. ఇది మరో మైల్ స్టోన్ లాంటి చిత్రమవుతుందని తెలిపింది. అలాగే మిథాలీ చాలా కూల్ కెప్టెన్ అంటూ తాప్సి కితాబిచ్చింది. ఇప్పటికే ‘రష్మి రాకెట్’ అనే చిత్రం కోసం అమ్మడు బాగా శ్రమించింది. ఎక్కువ సమయం జిమ్‌లోనే గడిపి తనను తాను మౌల్డ్ చేసుకుంది. ప్రస్తుతం ఆ వర్కవుట్స్ ఈ సినిమాకు కూడా బాగా కలిసొస్తున్నాయి.