சென்னை உள்பட தமிழகத்தின் பெரும்பாலான பகுதிகளில் வடகிழக்கு பருவமழை பெய்து வருகிறது. ஒருசில இடங்களில் வெள்ளம் ஏற்பட்டு பொதுமக்கள் கடும் அவதியில் உள்ளனர். இந்த நிலையில் இன்று எந்தெந்த பகுதியில் மழை பெய்ய வாய்ப்பு உள்ளது என்பது குறித்து தமிழ்நாடு வெதர்மேன் தன்னுடைய ஃபேஸ்புக்கில் பதிவு செய்துள்ளார்.

சென்னையில் இன்று விட்டுவிட்டு மழைபெய்யும். ஆனால் சென்னை மக்கள் கவலை கொள்ளும் அளவுக்கோ, வெள்ளம் ஏற்படும் அளவுக்கோ மழை இருக்காது. இன்னும் சொல்ல போனால் சென்னைக்கு இந்த மழை போதாது. இன்னும் நவம்பர் 6 மற்றும் 7ஆகிய தேதிகளில் சென்னையில் மேலும் மழையை எதிர்பார்க்கலாம். 

தென் மாவட்டங்கள் மற்றும் தமிழகத்தின் மேற்கு பகுதிகளிலும் இனிவரும் நாட்களில் மழை பெய்யும். இலங்கையின் அருகே தோன்றியுள்ள காற்றழுத்தம் காரணமாக உடுமலைபேட்டை, பொள்ளாச்சி, ஈரோடு ஆகிய பகுதிகளிலும், திருப்பூர், திண்டுக்கல், கன்னியாகுமரி, தூத்துக்குடி, மதுரை, திருநெல்வேலி, விருதுநகர், ராமநாதபுரம் மற்றும் டெல்டா மாவட்டங்களிலும் இன்று மழை பெய்யும். 

வட தமிழகத்தின் உள்பகுதியான திருவண்ணாமலை, வேலூர் ஆகிய பகுதிகளிலும் இன்று மழை பெய்யும். மேலும் நீலகிரி பகுதியில் வரும் நாட்களில் மழையை எதிர்பார்க்கலாம். 

இவ்வாறு தமிழ்நாடு வெதர்மேன் கூறியுள்ளார்.