கோலிவுட் திரை உலகை சேர்ந்த சீனியர் நடிகர் நடிப்பு பயிற்சியாளராகிறார் என்றும் அவர் எஸ்.எஸ்.ராஜமௌலி இயக்கத்தில் மகேஷ் பாபு நடிப்பில் உருவாக இருக்கும் திரைப்படத்தில் நடிக்கும் நட்சத்திரங்களுக்கு பயிற்சி அளிக்க உள்ளதாகவும் கூறப்படுகிறது.

’பாகுபலி’ ’பாகுபலி 2’ ’ஆர்.ஆர்.ஆர்’ ஆகிய சூப்பர் ஹிட் படங்களை இயக்கிய இயக்குனர் எஸ்.எஸ்.ராஜமெளலி அடுத்ததாக மகேஷ் பாபு நடிக்கும் படத்தை இயக்கவுள்ளார். இந்த படம் முழுக்க முழுக்க காடுகளில் நடக்கும் கதை அம்சம் கொண்டது என்றும் அனுமாரை மையமாக கொண்டு உருவாக்கப்பட்ட கதை என்றும் கூறப்படுகிறது.

இந்த படத்திற்காக ஒரு வருடம் ஆரம்ப கட்ட பணிகளை செய்து வரும் இயக்குனர் எஸ்.எஸ்.ராஜமெளலி விரைவில் படப்பிடிப்புக்கு செல்ல இருக்கும் நிலையில் இந்த படத்தில் நடிக்கும் நட்சத்திரங்களுக்கு நடிப்பு பயிற்சி அளிப்பதற்காக நடிகர் நாசரை நியமனம் செய்து இருப்பதாக கூறப்படுகிறது.

முறைப்படி நடிப்பு பயிற்சி பெற்று பல ஆண்டுகள் நடிப்பு துறையில் அனுபவம் உள்ள நடிகர் நாசர் இந்த படத்தில் நடிக்கும் நடிகர்களுக்கு ஹைதராபாத்தில் பயிற்சி தர இருப்பதாகவும், நடிப்பு பயிற்சி மட்டுமின்றி வசன பயிற்சி, வசன உச்சரிப்பு ஆகிய பயிற்சிகளையும் வழங்க உள்ளதாக கூறப்படுகிறது.

ஏற்கனவே எஸ்.எஸ்.ராஜமெளலி இயக்கத்தில் உருவான ’பாகுபலி’ படத்தின் இரண்டு பாகங்களிலும் நாசர் ஒரு முக்கிய கேரக்டரில் நடித்திருக்கிறார் என்பது குறிப்பிடத்தக்கது.