புதிய திரைப்படங்கள் வெளியான அடுத்த சில மணி நேரங்களில் தமிழ் ராக்கர்ஸ் இணையதளத்தில் அந்த படம் திருட்டுத்தனமாக வெளியாகி வருவதை அடுத்து தயாரிப்பாளர்கள் மிகப்பெரிய நஷ்டம் அடைந்தனர் என்பதும் இந்த கும்பலை பிடிப்பதற்கு பல ஆண்டுகளாக முயற்சி செய்தும் பிடிபடாமல் இருக்கின்றனர் என்பதும் தெரிந்தது.

இந்த நிலையில் நேற்று தனுஷ் நடித்த ’ராயன்’ திரைப்படம் சமீபத்தில் வெளியாகி நல்ல வரவேற்பு பெற்று வரும் நிலையில் இந்த படத்தை திருவனந்தபுரத்தில் உள்ள ஒரு தியேட்டரில் பார்த்த ஒருவர் திருட்டுத்தனமாக தனது மொபைலில் வீடியோ எடுத்தது தெரிய வந்தது.

இது குறித்த ரகசிய தகவல் காவல்துறைக்கு வந்ததை அடுத்து அந்த தியேட்டரில் அதிரடியாக நுழைந்த காவல்துறை அதிகாரிகள் வீடியோ படம் எடுத்த நபரை கைது செய்தனர். அவரிடம் விசாரணை நடத்தப்பட்ட போது தான் அந்த நபர் தமிழ் ராக்கர்ஸ் இணையதளத்திற்கு பதிவு செய்வதற்காக வீடியோ எடுத்தது தெரிய வந்தது. அதுமட்டுமின்றி இதே நபர் டெலிகிராம் உள்ளிட்ட சமூக வலைதளங்களிலும் திருட்டுத்தனமாக புதிய படங்களின் வீடியோவை வெளியிட்டுள்ளார்.

கோடிக்கணக்கில் செலவு செய்து தயாரிப்பாளர் எடுத்த படத்தை வெறும் 5000 ரூபாய் பணத்திற்காக தமிழ் ராக்கர்ஸ் இணையதளத்தில் அந்த நபர் பதிவு செய்தது விசாரணையில் தெரியவந்துள்ளது. மேலும் அந்த நபர் குறித்து ரகசியமாக தகவல் அளித்தது பிரபல மலையாள நடிகர் பிரித்விராஜ் மனைவி என்றும் தற்போது தெரியவந்துள்ளது.