கொரோனா வைரஸால் பாதிக்கப்பட்டவர்கள் தனியார் மருத்துவமனையில் அனுமதிக்கப்பட்டால் லட்சக்கணக்கில் செலவு செய்து வருவதும், அவ்வாறு செலவு செய்தாலும் ஒருசிலர் உயிர் பிழைக்க முடியாத நிலை ஏற்பட்டு வரும் நிலையில் தமிழகத்தைச் சேர்ந்த டாக்டர் ஒருவர் கொரோனாவை குணப்படுத்தும் மருந்தை 2 ரூபாய்க்கு கண்டுபிடித்துள்ளதாக வெளிவந்த செய்தி பெரும் பரபரப்பை ஏற்படுத்தி உள்ளது

கிருஷ்ணகிரி மாவட்டத்தை சேர்ந்த டாக்டர் வசந்தகுமார் என்பவர் சென்னை ஐகோர்ட்டில் மனு ஒன்றை தாக்கல் செய்துள்ளார். அந்த மனுவில், ‘கொரோனா வைரஸ்க்கு தான் மருந்து கண்டுபிடித்து உள்ளதாகவும் இதுகுறித்த ஆராய்ச்சி கட்டுரைகளை இந்திய மருத்துவ ஆராய்ச்சி கவுன்சிலுக்கு அனுப்பி உள்ளதாகவும் ஆனால் தனது கட்டுரை மீது எந்தவித உத்தரவும் பிறப்பிக்கப்படவில்லை என்றும் கூறியுள்ளார். எனவே தனது மனுவை பரிசீலித்து தகுந்த உத்தரவு பிறப்பிக்க மத்திய அரசுக்கும், இந்திய ஆராய்ச்சி மருத்துவ கவுன்சிலுக்கும் உத்தரவிட வேண்டும் என்று அவர் தனது மனுவில் குறிப்பிட்டுள்ளார்

இந்த மனு நேற்று விசாரணைக்கு வந்தபோது மனுதாரர் தரப்பில் ஆஜரான வழக்கறிஞர் ’தனது மனுதாரர் கண்டுபிடித்துள்ள மருந்து சார்ஸ் மற்றும் கொரோனா வைரஸ் உடல் செல்களில் நுழைய விடாமல் தடுக்கும் தன்மை கொண்டது என்றும் இந்த மருந்தின் விலை ரூபாய் இரண்டு மட்டுமே என்றும் இந்த மருந்தை உட்கொண்டால் கொரோனா நோய் வராமல் தடுக்கப்படும் என்றும் இதனால் ஏழை எளியோர்களுக்கு பயன் அளிக்கும் என்றும் வாதிட்டார்

இதனையடுத்து இந்த மருந்து குறித்து ஆய்வு செய்வதற்காக ஆய்வு அறிக்கையை மனுதாரர் மீண்டும் இந்திய மருத்துவ ஆராய்ச்சி கவுன்சிலுக்கும் மத்திய அரசுக்கும் மனுதாரர் அனுப்ப வேண்டும் என்றும் இந்த ஆய்வு அறிக்கையை உடனடியாக மருத்துவ கவுன்சில் பரிசீலித்து முடிவு எடுக்க வேண்டும் என்றும் நீதிபதிகள் உத்தரவிட்டனர்

தமிழக டாக்டரின் இந்த கண்டுபிடிப்பு நடைமுறைக்கு வந்தால் கொரோனா வைரஸ் இந்தியாவில் இருந்து மட்டுமின்றி உலகில் இருந்தே விரட்டப்பட்டுவிடும் என்பது குறிப்பிடத்தக்கது