‘పెళ్లిచూపులు’, అర్జున్ రెడ్డి’ చిత్రాల విజ‌యాల‌తో యూత్ స్టార్ విజయ్ దేవరకొండ చేతినిండా సినిమాలతో బిజీగా మారిపోయారు. ఇప్పటికే ‘మహానటి’, ‘టాక్సీవాలా’ చిత్రాలు విడుదలకు సిద్ధంగా ఉండగా.. బైలింగ్వల్ (తెలుగు, తమిళం) ఫిలిమ్ ‘నోటా’ చిత్రీకరణ జరుపుకుంటోంది. ఇదిలా ఉంటే.. ఇప్పుడు మరో కొత్త దర్శకుడు భరత్ కమ్మ దర్శకత్వంలో ఓ సినిమా చేస్తున్నారు విజయ్. ఈ చిత్రాన్ని ‘పెళ్లిచూపులు’ నిర్మాత యష్ రంగినేని నిర్మిస్తున్నారు. ఈ సినిమాతో మరో తమిళ సంగీత దర్శకుడు టాలీవుడ్‌కి పరిచయం కానున్నారు.

ఆ వివరాల్లోకి వెళితే.. గతంలో భరత్ కమ్మ ‘మరో ప్రపంచం’ అనే షార్ట్ ఫిలింను రూపొందించారు. ఆ షార్ట్ ఫిలింకు సంగీతం అందించారు జస్టిన్ ప్రభాకరన్. అప్పుడు వీరిమధ్య ఏర్పడిన స్నేహబంధంతో.. ఇప్పుడు భరత్ కమ్మ తెరకెక్కిస్తున్న చిత్రానికి సంగీత దర్శకత్వం బాధ్యతలు చేపట్టనున్నారు ప్రభాకరన్. ‘పన్నాయురం పద్మినియుం’, ‘ఆరెంజ్ మిఠాయ్‌’, ‘ఒరు నాల్ కూత్తు’ తో పాటు తాజాగా విడుదలైన ‘ఒరు నల్ల నాల్ పాతు సొల్రేన్’ సినిమాలకి సంగీత దర్శకత్వం వహించారు. మ‌రి టాలీవుడ్‌లో అనిరుధ్‌ రవిచంద్రన్, హిప్ హాప్ తమిళ వంటి త‌మిళ సంగీత ద‌ర్శ‌కుల‌ మాదిరిగా ప్రభాకరన్ కూడా తనదైన ముద్ర వేస్తారేమో చూడాలి.