கடந்த 2010ஆம் ஆண்டு வெளிவந்த புழல்’ என்ற திரைப்படத்தில் மூன்று கதாநாயகர்களில் ஒருவராக நடித்த மனோ என்ற நடிகர் கார் விபத்தில் பரிதாபமாக பலியானார். அவருக்கு வயது 37.

புழல் உள்பட ஒருசில திரைப்படங்களிலும் தனியார் தொலைக்காட்சியில் ‘மானாட மயிலாட’ என்ற நிகழ்ச்சியில் நடனமாடி பிரபலமானவருமான சென்னை கொரட்டூரை சேர்ந்த மனோவும், அவரது மனைவி லிவியாவும் தீபாவளி தினத்தில் அதாவது அக்டோபர் 27-ந்தேதி இரவு காரில் கூடுவாஞ்சேரியில் உள்ள நண்பர் வீட்டுக்கு சென்றனர். அதன்பின்னர் அவர்கள் திரும்பி சென்னைக்கு வந்து கொண்டு இருந்தபோது அவர்கள் வந்த கார் வண்டலூர்-மீஞ்சூர் சாலை அருகே திடீரென கட்டுப்பாட்டை இழந்து தாறுமாறாக ஓடியது.

இதனையடுத்து சாலை நடுவில் உள்ள தடுப்பு சுவரில் பயங்கரமாக மோதி விபத்துக்குள்ளானதில் பலத்த காயம் அடைந்த நடிகர் மனோ சம்பவ இடத்திலேயே பலியானார். அவரது மனைவி லிவியா பலத்த காயத்துடன் தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார். இந்த விபத்து குறித்து போக்குவரத்து போலீசார் விசாரணை நடத்தி வருகிறார்கள்.