சர்வதேச கிரிக்கெட் கவுன்சில் டி-20 உலகக்கோப்பை குறித்தான பல அறிவிப்புகளை வெளியிட்டு இருக்கிறது. அதில் இந்த ஆண்டு நடக்கவிருந்த 2020 டி-20 உலகக்கோப்பை கொரோனா காரணமாக தள்ளி வைக்கப்பட்டு 2022 இல் ஆஸ்திரேலியாவில் நடத்தப்படும் எனக் கூறப்பட்டுள்ளது. 2021 டி-20 உலகக்கோப்பை கிரிக்கெட் போட்டிகள் திட்டமிட்டப்படி இந்தியாவில் அடுத்த ஆண்டு நடைபெறும் எனவும் ஐசிசி தெரிவித்து இருக்கிறது.

இதுதொடர்பாக நடைபெற்ற சர்வதேச கிரிக்கெட் வாரியக் கூட்டத்தை தொடர்ந்து வெளியிட்டப்பட்ட அறிக்கையில் “கொரோனா நோய்த்தொற்று பரவலால் ஒத்திவைக்கப்பட்ட நிகழாண்டுக்கான டி-20 உலகக்கோப்பை கிரிக்கெட் போட்டி, ஆஸ்திரேலியாவில் 2022-ஆம் ஆண்டு நடைபெறும் என்பதை ஐசிசி வெள்ளிக்கிழமை உறுதி செய்தது. இந்தியாவில் 2021-ஆம் ஆண்டு டி-20 உலகக்கோப்பை போட்டி திட்டமிட்டப்படி நடத்தப்படும். மேலும், நியூசிலாந்தில் 50 ஓவர் மகளிர் கிரிக்கெட் உலகக்கோப்பை தொடரை வரும் பிப்ரவரி மாதம் நடத்த திட்டமிட்டு இருந்தோம். ஆனால் கொரோனா அச்சுறுத்தல் காரணமாக 2022 ஆண்டிற்கு அந்த தொடரை ஒத்தி வைத்துள்ளோம்” எனக் கூறப்பட்டுள்ளது.