'సైరా నరసింహారెడ్డి' హాలీవుడ్ టెక్నీషియన్స్
- IndiaGlitz, [Saturday,June 02 2018]
'బాహుబలి' సిరీస్‌తో తెలుగు సినిమా స్టామినా ప్రపంచవ్యాప్తంగా తెలిసింది. ఇక ఈ సినిమాలో పనిచేసిన హాలీవుడ్ టెక్నీషియన్స్ వలన ఈ సినిమా విజువల్‌గా మరింత అందంగా కనిపించింది. ఇదే బాటలో 'హలో', 'నా పేరు సూర్య నా ఇల్లు ఇండియా' సినిమాలలో కూడా హాలీవుడ్ టెక్నీషియ‌న్స్‌ను తీసుకుని ఆ సినిమాలను వెండితెర పై మరింత అందంగా చూపించారు. ఇక ప్రస్తుతం చిత్రీకరణ జరుపుకుంటున్న 'సాహో' విష‌యానికి వ‌స్తే.. ఇటీవల దుబాయ్‌లో షూట్ చేసిన యాక్షన్ సీన్స్ కోసం హాలీవుడ్ టెక్నీషియన్స్ స‌హాయాన్ని తీసుకున్న విషయం తెలిసిందే.
త‌మ సినిమా కొత్త‌గా, ఉన్నతంగా ఉండాల‌నుకొనే ద‌ర్శ‌క‌నిర్మాత‌లు హాలీవుడ్ టెక్నీషియన్స్ వైపు చూస్తున్నారు. ప్రస్తుతం మెగాస్టార్ చిరంజీవి ప్రధాన పాత్రలో నటిస్తున్న 'సైరా నరసింహారెడ్డి' సినిమాకి కూడా విదేశీ నిపుణులు ప‌నిచేస్తున్నారని సమాచారం. జూన్ 7వ తేదీ నుండి హైదరాబాద్‌లో వేసిన ప్రత్యేకమైన సెట్‌లో కొన్ని యాక్షన్ సన్నివేశాలను చిత్రీకరిస్తున్నారు.
ఈ సన్నివేశాలను కొంతమంది హాలీవుడ్ నిపుణుల పర్యవేక్షణలో చిత్రీకరించనున్నార‌ని తెలుస్తోంది. కాగా ఈ షెడ్యూల్‌లో బిగ్ బి అమితాబ్ బచ్చన్, విజయ్ సేతుపతి, జగపతి బాబు వంటి ముఖ్య తారాగణం పాల్గొంటున్నట్టు సమాచారం.
రూ.200 కోట్ల భారీ బడ్జెట్‌తో మెగాపవర్ స్టార్ రామ్ చరణ్ నిర్మిస్తున్న ఈ సినిమాకి సురేందర్ రెడ్డి దర్శకత్వం వహిస్తున్నారు.