கோலிவுட் திரையுலகின் தீர்க்க முடியாத பிரச்சனையாக இருந்து வருவது தமிழ் ராக்கர்ஸ். முன்கூட்டியே சொல்லி புதிய திரைப்படங்களை முதல் காட்சி திரையரங்குகளில் முடியும் முன்னரே தமிழ் ராக்கர்ஸ் திருட்டுத்தனமாக வெளியிட்டு வருகிறது. தமிழ் திரைப்படத் தயாரிப்பாளர் சங்கமும் தமிழக அரசும் பல்வேறு நடவடிக்கைகள் எடுத்தும் இந்த இணையதளத்தை கட்டுப்படுத்த முடியவில்லை.

இந்த நிலையில் தமிழ் ராக்கர்ஸ் இணையதளம் குறித்து சர்ச்சைக்குரிய ஒரு கருத்தை பாஜக பிரமுகரும் நடிகருமான எஸ்.வி.சேகர் தெரிவித்துள்ளார். புதிய படங்களை லீக் செய்யும் தமிழ் ராக்கர்ஸ் இணையதத்தை குறை கூற முடியாது என்றும் இது விஞ்ஞான வளர்ச்சியின் எதிரொலி என்றும், இனிமேல் திரைப்படம் எடுப்பவர்கள் தமிழ் ராக்கர்ஸ் இணையதளத்திற்கு படத்தை விற்றுவிடலாம் என்றும் கூறியுள்ளார்.

ஒரே ஒரு இணையதளம், ஒட்டுமொத்த திரைத்துறைக்கே சவால் விட்டு வரும் நிலையில் அதனை தடுக்க வழி கூறாமல், அந்த இணையதளத்திற்கே படத்தை வித்துட்டு போங்க என எஸ்.வி.சேகர் கூறியுள்ளது கோலிவுட் திரையுலகினர்களை பெரும் அதிர்ச்சியை ஏற்படுத்தியுள்ளது.