நடிகர் சிம்பு தற்போது வெங்கட் பிரபு இயக்கத்தில் சுரேஷ் காமாட்சி தயாரிப்பில் யுவன் சங்கர் ராஜா இசையில் ’மாநாடு’ என்ற திரைப்படத்தில் நடித்து வருகிறார் என்பது தெரிந்ததே. கொரோனா வைரஸ் ஊரடங்கு காரணமாக நிறுத்தப்பட்டிருந்த இந்த படத்தின் படப்பிடிப்பு மிக விரைவில் தொடங்கும் என்று எதிர்பார்க்கப்படுகிறது

இந்த நிலையில் இயக்குனர் சுசீந்திரன் இயக்கும் ஒரு படத்தில் சிம்பு நடிக்க இருப்பதாகவும் இந்த படத்தின் படப்பிடிப்பை முப்பதே நாட்களில் முடிக்க சுசீந்திரன் திட்டமிட்டுள்ளதாகவும் செய்திகள் வெளியானது. மேலும் இந்த படத்தின் படப்பிடிப்பு விரைவில் திண்டுக்கல்லில் தொடங்க உள்ளதாகவும் வெளிவந்த செய்தியைப் பார்த்தோம்

இந்த நிலையில் தற்போது வந்துள்ள தகவலின்படி இந்த படத்தின் படப்பிடிப்பை திண்டுக்கல்லில் இயக்குனர் சுசீந்திரன் தொடங்கியுள்ளதாக தெரிகிறது. இந்த படப்பிடிப்பில் வரும் எட்டாம் தேதி முதல் சிம்பு கலந்து கொள்வார் என்றும் அதுவரை அவர் இல்லாத காட்சிகள் படமாக்கப்படும் என்றும் தெரிகிறது

மேலும் இந்த படத்தில் சிம்பு ஜோடியாக பூமி படத்தில் ஜெயம் ரவி ஜோடியாக நடித்த நிதி அகர்வால் நடிக்க இருப்பதாக தெரிகிறது. திரு ஒளிப்பதிவில் உருவாகும் இந்த படத்தை சிம்பு சினி ஆர்ட்ஸ் நிறுவனம் தயாரித்து வருகிறது. இந்த படத்தின் படப்பிடிப்பை முடித்துவிட்டு அதன்பின்னர் ‘மாநாடு’ படத்தின் படப்பிடிப்புக்கு நடிகர் சிம்பு செல்வார் என்று எதிர்பார்க்கப்படுகிறது