సూర్య తదుపరి ఖరారైంది
- IndiaGlitz, [Saturday,December 21 2019]
తమిళంతో పాటు తెలుగులో మార్కెట్‌ ఉన్న హీరోల్లో సూర్య ఒకరు. ఈయన ప్రస్తుతం సుధా కొంగర దర్శకత్వంలో ‘ఆకాశం నీ హద్దురా’ అనే సినిమా చేస్తోన్న సంగతి తెలిసిందే. ఈ సినిమా వచ్చే ఏడాది విడుదలకు సిద్ధమవుతుంది. ఈ సినిమా పూర్తి కాగానే డైరెక్టర్‌ శివ దర్శకత్వంలో స్టూడియో గ్రీన్‌ పతాకంపై జ్ఞానవేల్‌ రాజా నిర్మాతగా ఓ సినిమా చేస్తాడని అధికారికంగా ప్రకటించారు. అయితే ఇప్పుడు సూపర్‌స్టార్‌ రజినీకాంత్‌తో డైరెక్టర్‌ శివ సినిమా చేయబోతున్నాడు. త్వరలోనే ఈ సినిమా స్టార్ట్‌ అవుతుంది.
ఈ సినిమా పూర్తి కావడానికి ఆరు నుండి ఎనిమిది నెలల సమయం పట్టే అవకాశం ఉంది. దీంతో సూర్య ఈలోపు మరో సినిమాను పూర్తి చేయాలని నిర్ణయించుకున్నాడు. సూర్య తదుపరి చిత్రం.. అంటే సూర్య 40వ చిత్రం ఖరారైంది. రీసెంట్‌గా తమిళంలో ఘన విజయం సాధించిన చిత్రం ‘అసురన్‌' దర్శకుడు వెట్రిమారన్‌, నిర్మాత కలైపులి థాను కాంబినేషన్‌లో మరో సినిమా రూపొందనుంది. ఈ సినిమాలో సూర్య హీరోగా నటించబోతున్నారు. ప్రస్తుతం ప్రీ ప్రొడక్షన్‌ పనులు జరుగుతున్నాయట. సూర్య వంటి డిఫరెంట్‌ సినిమాలు చేయాలనుకునే హీరో, డిఫరెంట్‌ సినిమాలను తెరకెక్కించే వెట్రిమారన్‌లాంటి డైరెక్టర్‌తో సినిమా అంటే సినిమాపై ఎలాంటి అంచనాలు ఏర్పడతాయనేది ప్రత్యేకంగా చెప్పనక్కర్లేదు. అలాగే సూర్యకు తమిళంతో పాటు తెలుగులో మార్కెట్‌ ఉండటంతో నిర్మాత కలైపులి థానుకి కూడా ఈ ప్రాజెక్ట్‌ కలిసి వచ్చినట్టేనని అనుకోవచ్చు.