சூர்யா, கீர்த்திசுரேஷ் நடிப்பில் விக்னேஷ் சிவன் இயக்கத்தில் உருவாகி வரும் 'தானா சேர்ந்த கூட்டம்' படத்தின் படப்பிடிப்பு இறுதிக்கட்டத்தை நெருங்கியுள்ள நிலையில் இந்த படத்தின் டீசர் சூர்யாவின் பிறந்த நாளில் வெளிவரும் என்று எதிர்பார்க்கப்படுகிறது.

'தானா சேர்ந்த கூட்டம்' திரைப்படம் இந்தியில் அக்சயகுமார் நடித்த 'ஸ்பெஷல் 26' படத்தின் ரீமேக் என்று கூறப்படுகிறது. இந்நிலையில் இந்தியில் இந்த படத்தில் பாடல்களே இல்லாத நிலையில் தமிழிலும் பாடல்கள் இல்லாமல் இருக்குமா? என்ற கேள்வி ரசிகர்களிடையே எழுந்தது. ஆனால் விக்னேஷ் சிவன்-அனிருத் கூட்டணியில் உருவாகும் இந்த படத்தில் பாடல் இல்லாமல் இருக்க வாய்ப்பே இல்லை என்றும் ஒரு தரப்பினர் கூறினர்.

இந்த நிலையில் ''தானா சேர்ந்த கூட்டம்'' படத்தில் எட்டு பாடல்கள் இருப்பதாக புதிய தகவல் ஒன்று வெளிவந்துள்ளது. மேலும் இந்த படத்தின் கதையோட்டத்தை எட்டு பாடல்களும் எந்தவிதத்திலும் பாதிக்காத வகையில் உருவாக்கி சூர்யா உள்பட படக்குழுவினர் அனைவருக்கும் அனிருத் ஆச்சரியத்தை அளித்துள்ளார் என்று கூறப்படுகிறது.

சூர்யா, கீர்த்திசுரேஷ், செந்தில், சரண்யா பொன்வண்ணன், ரம்யா கிருஷ்ணன், கோவை சரளா, கே.எஸ்.ரவிகுமார், ஆனந்த்ராஜ், ஆர்ஜே பாலாஜி, சுரேஷ்மேனன், தம்பி ராமையா உள்ளிட்டோர் நடித்துள்ள இந்த படத்தை 2D எண்டர்டெயின்மெண்ட் நிறுவனம் தயாரித்து வருகிறது. இந்த படத்திற்கு தினேஷ் கிருஷ்ணன் ஒளிப்பதிவும், ஸ்ரீகர் பிரசாத்தும் படத்தொகுப்பும் செய்துள்ளனர். இந்த படம் இவ்வருட இறுதியில் அல்லது அடுத்த வருடம் வெளியாகும் என்று எதிர்பார்க்கப்படுகிறது.