టాలీవుడ్ ఎంట్రీ కోసం సూర్య అదిరిపోయే స్కెచ్‌..!
- IndiaGlitz, [Tuesday,March 23 2021]
కోలీవుడ్ స్టార్ హీరో సూర్య ఎప్పుడో టాలీవుడ్‌లో త‌న‌దైన మార్క్ క్రియేట్ చేసుకుని ఓ మార్కెట్‌నుక్రియేట్ చేసుకున్నాడుగా, ఇప్పుడేంటి కొత్తగా టాలీవుడ్ ఎంట్రీకి ప్లాన్ చేయ‌డం అనే సందేహం రావొచ్చు. కానీ సూర్య టాలీవుడ్ ఎంట్రీకి ప్లాన్ చేస్తోంది హీరోగా కాదు.. నిర్మాత‌గా. సూర్య 2 డీ ఎంట‌ర్‌టైన్‌మెంట్ అనే బ్యాన‌ర్‌ను స్టార్ట్ చేసిన మినిమం బ‌డ్జెట్ సినిమాలు చేస్తున్న సంగ‌తి తెలిసిందే. జ్యోతిక రీ ఎంట్రీలో ఆమెతో ఎక్కువ సినిమాలు చేసింది సూర్య‌నే. ఇప్పుడు సూర్య నిర్మాత‌గా టాలీవుడ్‌లోకి ఎంట్రీ ఇవ్వాల‌నుకుంటున్నాడ‌ట. అయితే త‌న‌కు తానుగా వ‌స్తే.. సినిమా రిలీజ్‌ల విష‌యంలో ఏదేని స‌మ‌స్య‌లు వ‌చ్చే అవ‌కాశం ఉంది. దీంతో సూర్య ఓ ప్లాన్ వేశాడ‌ట.
ఆ ప్లానింగ్ ప్ర‌కారం ఇక్క‌డ ఓ అగ్ర నిర్మాణ సంస్థ‌తో టై అప్ అవుతున్నాడ‌ట. తెలుగులో డిఫ‌రెంట్ కాన్సెప్ట్ చిత్రాల‌కు ఆద‌ర‌ణ పెరుగుతున్న నేప‌థ్యంలో సూర్య ఈ నిర్ణ‌యం తీసుకున్నాడ‌ట. కొత్త టాలెంట్‌ను ఎంక‌రేజ్ చేయ‌డంతో పాటు.. నిర్మాత‌గానూ టాలీవుడ్‌లో రాణించాల‌ని సూర్య భావిస్తున్నాడ‌ట. ఇక సినిమాల విష‌యానికి వ‌స్తే పాండిరాజ్ ద‌ర్శ‌క‌త్వంలో సూర్య ఓ సినిమా చేస్తోన్న సంగ‌తి తెలిసిందే. ఇది కాకుండా వెట్రిమార‌న్ ద‌ర్శ‌క‌త్వంలోనూ సూర్య ఓ సినిమా చేయాల్సి ఉంది.