நடிகர் கார்த்தி நடிக்கும் புதிய படத்தை, அவரது அண்ணன் சூர்யா தயாரிக்கவுள்ளார்.

இயக்குனர் மணிரத்னம் அவர்களின் பிரமாண்ட படமான "பொன்னியின் செல்வன்" திரைப்படத்தில், கார்த்திக் வந்தியதேவனாக நடித்து வருகிறார். இவருடைய கதாபாத்திரத்தின் படப்பிடிப்பு காட்சிகள் செப்டம்பர் மாதத்திற்குள் முடிவடையும் என்று கூறப்படுகிறது. இப்படத்திற்கு பின் இயக்குனர் பி.எஸ்.மித்ரனின் "சர்தார்" படத்தில் நடிக்க கமிட்டாகி உள்ளார் கார்த்தி.

இதற்கிடையே இயக்குனர் முத்தையாவின் புதிய படத்தில் கார்த்தி நடிக்கவிருப்பதாக தகவல்கள் வெளியாகி உள்ளது. இப்படத்தை தன்னுடைய "2டி என்டர்டெயின்மெண்ட்" தயாரிப்பு நிறுவனம் மூலம் நடிகர் சூர்யாவே தயாரிக்க உள்ளார். ஏற்கனவே தனது சகோதரர் கார்த்தியின், "கடைக்குட்டி சிங்கம்" படத்தை சூர்யா தான் தயாரித்து, அதில் கெஸ்ட் ரோலிலும் நடித்திருந்தார்.

இதேபோல் முத்தையா இயக்கத்தில், கார்த்தி நடிப்பில் வெளியான "கொம்பன்" திரைப்படம் பட்டிதொட்டியெல்லாம் பட்டையை கிளப்பியது. இந்நிலையில் இவர்கள் கூட்டணி மறுபடியும் இணைந்துள்ளதால், ரசிகர்கள் மத்தியில் எதிர்பார்ப்பு அதிகரித்துள்ளது என்பது குறிப்பிடத்தக்கது.