ఐపీఎల్‌కు సిద్ధమవుతున్న చెన్నై సూపర్‌ కింగ్స్‌ జట్టుకు షాకుల మీద షాకులు తగులుతున్నాయి. నిన్నటికి నిన్న జట్టులోని 13 మందికి కరోనా సోకినట్టు తేలింది. కాగా.. నేడు ఆ జట్టు స్టార్ ప్లేయర్ సురేష్ రైనా టోర్నీ నుంచి తప్పుకుంటున్నట్టు వెల్లడించి షాకిచ్చాడు. అయితే తాను వ్యక్తిగత కారణాలతోనే జట్టు నుంచి తప్పుకుంటున్నట్టు రైనా ప్రకటించాడు. ఈ విషయాన్ని సీఎస్‌కే జట్టు ట్విట్టర్ వేదికగా వెల్లడించింది. ఈ సమయంలో తాము రైనాకు, ఆయన కుటుంబానికి పూర్తి మద్దతిస్తామని సీఎస్‌కే ట్వీట్‌లో పేర్కొంది.

కాగా చెన్నై సూపర్ కింగ్స్ జట్టులో ఒకరిద్దరు కాదు ఏకంగా 13 మంది కొవిడ్‌ బారినపడ్డారు. వీరిలో పరిమిత ఓవర్లలో టీమిండియాకు ఆడిన ఓ యువ పేసర్‌ కూడా ఉన్నట్టు సమాచారం. ఆ యువ పేసర్ పేరు వెల్లడించక పోయినా ఆ క్రికెటర్‌ దీపక్‌ చాహర్‌ లేదా శార్దూల్‌ ఠాకూర్‌లలో ఒకరు కావొచ్చని క్రికెట్ అభిమానులు భావిస్తున్నారు. అయితే యువ పేసర్ మినహా కొవిడ్‌ బారినపడిన మిగిలిన 12 మంది జట్టులోని సహాయక సిబ్బంది అని సమాచారం.

ఐపీఎల్‌ కొవిడ్‌ ప్రొటోకాల్‌ ప్రకారం.. యూఏఈలో అడుగుపెట్టగానే జట్లన్నింటికీ విమానాశ్రయంలోనే కరోనా పరీక్షలు నిర్వహిస్తారు. అనంతరం వారందరినీ ఓ హోటల్‌లో క్వారంటైన్‌లో ఆరు రోజుల పాటు ఉంచి మూడు సార్లు కరోనా పరీక్షలు నిర్వహిస్తారు. ఈ క్రమంలోనే గురువారం చెన్నై సూపర్ కింగ్స్ జట్టు కరోనా పరీక్షకు హాజరైంది. వీరిలో మొత్తం 13 మంది పాజిటివ్‌గా తేలారు. దీంతో శుక్రవారం జట్టులోని మరింతమందికి పరీక్షలు నిర్వహించారు. వాస్తవంగా సీఎస్‌కే శుక్రవారం ప్రాక్టీస్‌ ప్రారంభించాల్సి ఉంది. 13 మందికి కరోనా నిర్ధారణ కావడంతో ప్రాక్టీస్ కొద్ది రోజుల పాటు వాయిదా పడింది. అలాగే సీఎస్‌కే జట్టు స్వీయ నిర్భంధం కూడా వచ్చేనెల ఒకటి వరకు కొనసాగనుంది.